Një hetim i gazetës britanike Daily Mail ka zbuluar ekzistencën e një rrjeti kontrabande që ndihmon emigrantë të përfshirë në veprimtari kriminale të largohen nga Mbretëria e Bashkuar, duke shmangur përballjen me drejtësinë. Sipas raportimit, rrjeti drejtohej nga një shtetas shqiptar, i cili vetë ishte në kërkim penal.
Hetimi tregon se organizatori, i identifikuar me emrin Alfons, ofronte shërbime të paligjshme transporti përmes kamionëve drejt Francës, kundrejt një pagese prej rreth 2,500 paundësh për person. Ai e promovonte aktivitetin në rrjete sociale nën emërtimin “Kthimet nga Anglia”, duke garantuar kalim të sigurt dhe të shpejtë për persona që kërkonin të largoheshin nga Britania për shkak të hetimeve ose dënimeve të mundshme penale.
Sipas deklarimeve të tij për një gazetar të infiltruar, Alfons pretendonte se kishte ndihmuar të paktën 50 persona të largoheshin nga vendi, përfshirë individë të dyshuar ose të dënuar për vepra të rënda penale. Ai shpjegonte se largimi përmes kamionëve shmangte kontrollet që zakonisht kryhen në aeroporte dhe porte detare.
Hetimi vjen në një kohë kur autoritetet britanike po shprehin shqetësim për rritjen e numrit të emigrantëve të paligjshëm të përfshirë në krime serioze. Sipas të dhënave zyrtare, në Mbretërinë e Bashkuar ndodhen mbi 1,000 shtetas të huaj të dënuar ose të dyshuar për krime të rënda, përfshirë vrasje, përdhunime dhe terrorizëm.
Alfons, i cili aktualisht dyshohet se ndodhet në Belgjikë, ka deklaruar se ishte arratisur vetë nga Britania pasi kishte prerë një pajisje elektronike monitorimi, e vendosur ndaj tij në pritje të gjykimit për një çështje të lidhur me kultivimin e kanabisit.
About the Author
