Socialistët kërkojnë masa të rënda disiplinore dhe përjashtimin e 29 deputetëve të opozitës pas seancës së 18 dhjetorit
Sekretariati i Etikës në Kuvendi i Shqipërisë mblidhet sot në orën 10:00 për të shqyrtuar kërkesën e Partia Socialiste për ndëshkimin e deputetëve të opozitës, të përfshirë në skenat e tensionit dhe kaosit gjatë seancës plenare të 18 dhjetorit.
Mbledhja e mëparshme ishte shtyrë, pasi përfaqësuesit e opozitës kërkuan të njiheshin paraprakisht me provat mbi të cilat mbështetet kërkesa për masa disiplinore. Këtë herë, socialistët insistojnë jo vetëm në përjashtime nga aktiviteti parlamentar, por edhe në verifikim penal për disa deputetë.
Sipas kërkesës së PS, Prokuroria duhet të vlerësojë nëse ka vend për nisjen e procedimit penal ndaj Flamur Noka dhe Klevis Balliu, për përplasjet e ndodhura me punonjësit e Gardës gjatë seancës.
Në këtë kuadër, kërkohet përjashtimi 60-ditor nga Kuvendi për Flamur Nokën, Klevis Balliun, Belindë Këlliçi, e akuzuar për ndezjen e tymueseve në sallë, si edhe për Albana Vokshi, Fidel Kreka, Ledina Alolli, Denisa Vata, si dhe për Sali Berisha dhe Gazment Bardhi, të cilët konsiderohen nga mazhoranca si organizatorë të dhunës, edhe pse nuk morën pjesë drejtpërdrejt në përplasjet fizike.
Ndërkohë, për deputetët e tjerë të opozitës që rrethuan foltoren dhe penguan zhvillimin normal të seancës, PS kërkon masa më të lehta, konkretisht përjashtim 10-ditor nga seancat plenare.
Vendimi i Sekretariatit të Etikës pritet të shënojë një tjetër përshkallëzim të tensioneve politike në Kuvend, në një klimë të polarizuar mes mazhorancës dhe opozitës.
About the Author
