Nottingham Forest humbet një ikonë historike, njeriun që Brian Clough e quante artistin e fushës së blertë
Futbolli britanik është veshur në zi pas ndarjes nga jeta të John Robertson, ish-mesfushorit skocez dhe një prej figurave më të mëdha në historinë e Nottingham Forest.
Lajmi u bë i ditur nga vetë klubi anglez, i cili përmes një komunikate zyrtare i dha lamtumirën një prej talenteve më të rralla që ka veshur fanellën e Forest. Klubi vlerësoi jo vetëm aftësitë e jashtëzakonshme teknike të Robertson, por edhe përulësinë, karakterin dhe përkushtimin e tij të palëkundur ndaj skuadrës.
I lindur në vitin 1953, John Robertson ishte një nga shtyllat kryesore të ekipit legjendar që dominoi futbollin europian në fund të viteve ’70. Ai ishte protagonist absolut në dy triumfet historike radhazi në Kupën e Kampionëve të Europës në vitet 1979 dhe 1980, suksese që e futën Nottingham Forest në panteonin e klubeve më të mëdha të kontinentit.
Gjatë periudhës së artë 1978–1980, Forest fitoi gjithçka që mund të fitohej: kampionatin anglez, Charity Shield, Kupën e Ligës, Superkupën e UEFA-s dhe dy herë radhazi trofeun më prestigjioz europian. Në qendër të këtij suksesi ishte edhe Robertson, i njohur për vizionin e jashtëzakonshëm, pasimet vendimtare dhe qetësinë artistike në lojë.
Trajneri legjendar Brian Clough e quante Robertson “Picasso i futbollit”, një nofkë që përshkruante më së miri stilin e tij unik dhe aftësinë për të krijuar art në fushë. Për tifozët e Nottingham Forest, ai nuk ishte thjesht një lojtar i madh, por simbol i identitetit dhe lavdisë së klubit.
Në një sondazh të viteve të fundit, John Robertson u votua si lojtari më ikonë dhe më i dashur në historinë e Nottingham Forest, një dëshmi e qartë e gjurmës së pashlyeshme që ka lënë në futbollin britanik.
Ndarja e tij nga jeta shënon humbjen e një epoke dhe të një figure që do të kujtohet gjithmonë si artisti i heshtur që e ktheu futbollin në art.
About the Author
