Udhëheqësi i Koresë së Veriut sinjalizon zgjerim të angazhimit ushtarak jashtë vendit, mes raportimeve për humbje të rënda njerëzore
Udhëheqësi i Koresë së Veriut, Kim Jong-un, ka vlerësuar publikisht trupat koreano-veriore që luftojnë jashtë vendit, duke e cilësuar bashkëpunimin me Rusinë si një aleancë të pathyeshme. Deklaratat u bënë në mesazhin e Vitit të Ri, sipas raportimeve të mediave shtetërore në Phenian.
Sipas shërbimeve të inteligjencës së Koresë së Jugut dhe agjencive perëndimore, Koreja e Veriut ka dërguar mijëra ushtarë për të mbështetur Rusinë në luftën kundër Ukrainës. Vlerësimet flasin për të paktën 600 ushtarë të vrarë dhe mijëra të plagosur, ndërsa Pheniani dyshohet se përfiton ndihmë financiare, teknologji ushtarake si dhe furnizime ushqimore dhe energjetike në këmbim të mbështetjes ushtarake.
Në fjalimin e tij, Kim Jong-un i përshkroi trupat që luftojnë në toka të huaja si mbrojtës të nderit kombëtar, duke i inkurajuar të tregohen të guximshëm dhe duke theksuar se pas tyre qëndrojnë Pheniani dhe Moska. Ai la të kuptohet se gjatë vitit 2026 mund të ketë angazhime të tjera ushtarake jashtë kufijve të vendit.
Festimet e Vitit të Ri në Phenian u shoqëruan me një ceremoni madhështore në stadiumin May Day, ku Kim u shfaq në publik së bashku me bashkëshorten e tij dhe vajzën Ju Ae, e cila konsiderohet gjerësisht si pasardhëse e mundshme politike.
Megjithatë, përtej deklaratave zyrtare, raportime të shumta hedhin dritë mbi kushtet e vështira të ushtarëve koreano-veriorë në front. Sipas inteligjencës së Koresë së Jugut dhe dëshmive të dy ushtarëve të kapur nga forcat ukrainase, Pheniani u ka dhënë udhëzim trupave të mos bien të gjallë në duart e armikut, duke thelluar shqetësimet ndërkombëtare për koston njerëzore të këtij bashkëpunimi ushtarak.
About the Author
