Një i ri hyri mes flakëve për të ndihmuar festuesit e bllokuar në Le Constellation, ndërsa bilanci i tragjedisë së Vitit të Ri në Crans-Montana rëndohet me dhjetëra viktima
Një natë që duhej të shënonte fillimin e Vitit të Ri u kthye në një skenë kaosi dhe frike në resortin luksoz të Alpeve zvicerane, ku një zjarr i fuqishëm përfshiu barin Le Constellation, duke shkaktuar dhjetëra viktima dhe mbi njëqind të plagosur.
Mes të parëve që reaguan ishte një dëshmitar i ri, i cili pa hezituar vrapoi drejt godinës së përfshirë nga flakët për të ndihmuar njerëzit e bllokuar brenda. Ai tregoi se jashtë mbizotëronte panik, me njerëz që vraponin dhe kërkonin ndihmë, ndërsa tymi dhe flakët përhapeshin me shpejtësi.
Sipas tij, ai theu një dritare dhe arriti të nxirrte disa persona, duke u dhënë ujë dhe rroba të ngrohta të lënduarve, madje edhe duke u dhuruar xhaketën e tij. I riu u shpreh se nuk u largua nga vendngjarja për një kohë të gjatë, pasi kishte frikë se një familjar i tij mund të ndodhej ende brenda lokalit.
Dëshmitarë të tjerë përshkruan momente konfuzioni dhe frike, ndërsa njerëzit përpiqeshin të gjenin dalje nëpër tym, në një ambient të mbipopulluar dhe me shkallë të ngushta. Shumë prej tyre arritën të shpëtonin vetëm duke thyer dritare ose duke u ndihmuar nga persona të rastësishëm jashtë lokalit.
Autoritetet zvicerane konfirmojnë se zjarri shpërtheu rreth orës 01:30 të mëngjesit të 1 janarit dhe se hetimet janë ende në fazën fillestare. Dyshohet se përdorimi i mjeteve piroteknike ose qirinjve dekorativë brenda ambientit mund të ketë qenë shkak, por ende nuk ka një konkluzion zyrtar.
Në operacionin e shpëtimit u angazhuan dhjetëra ambulanca, helikopterë dhe qindra punonjës emergjence. Spitalet e zonës raportuan mbingarkesë, ndërsa autoritetet ngritën linja të posaçme për familjarët që kërkonin informacion për të afërmit e tyre.
Tragjedia ka tronditur Zvicrën dhe komunitetin ndërkombëtar, ndërsa dëshmitë e atyre që përjetuan nga afër ngjarjen hedhin dritë mbi momentet dramatike të një nate që do të mbetet gjatë në kujtesën e opinionit publik.
About the Author
