Rajnath Singh thotë se individë me arsim të lartë po veprojnë kundër shoqërisë dhe sigurisë kombëtare
Ministri i Mbrojtjes i Indisë, Rajnath Singh, ka ngritur alarmin për një prirje shqetësuese të terrorizmit të ashtuquajtur të jakave të bardha, duke deklaruar se persona me arsim të lartë dhe diploma universitare po përfshihen në aktivitete terroriste kundër vendit dhe shoqërisë.
Deklarata u bë gjatë fjalës së tij në 104 vjetorin e themelimit të Bhupal Nobles’ University në qytetin Udaipur, ku Singh iu referua drejtpërdrejt shpërthimit me makinë-bombë pranë Kalasë së Kuqe në Delhi, një sulm që i mori jetën 15 personave dhe plagosi disa të tjerë.
Sipas ministrit, hetimet kanë zbuluar se autorët e sulmit ishin mjekë, persona që në jetën e përditshme kujdesen për shëndetin e qytetarëve, por që në këtë rast u përfshinë në një akt të rëndë dhune. Ai theksoi se ky fakt tregon qartë se arsimi, nëse nuk shoqërohet me vlera morale, etikë dhe karakter, mbetet i paplotë dhe potencialisht i rrezikshëm.
Ngjarja e 10 nëntorit ndodhi kur një automjet tip i20 shpërtheu pranë një zone të ndjeshme në kryeqytet. Autoritetet indiane kanë bërë të ditur se drejtuesi i makinës ishte pjesë e një rrjeti më të gjerë terrorist me bazë në Faridabad, ndërsa disa mjekë të tjerë të përfshirë në këtë rrjet janë arrestuar.
Rajnath Singh nënvizoi se terroristët nuk janë domosdoshmërisht njerëz pa shkollë apo pa arsim. Sipas tij, ata mund të kenë diploma universitare dhe tituj akademikë, por mungesa e urtësisë dhe e vlerave njerëzore i shtyn drejt ekstremizmit dhe dhunës.
Ministri theksoi se qëllimi i vërtetë i arsimit nuk është vetëm suksesi profesional, por edhe formimi i moralit, etikës dhe përgjegjësisë shoqërore. Ai paralajmëroi se pa këto elemente, edhe një shoqëri me nivel të lartë arsimor mund të përballet me kërcënime serioze për sigurinë kombëtare të Indisë.
About the Author
