Dërgesa me fruta deti u rrëmbye gjatë transportit drejt Illinois dhe Minnesota, FBI nis hetimet
Një ngarkesë me karavidhe të gjalla me vlerë rreth 400 mijë dollarë është grabitur në Shtetet e Bashkuara, teksa ishte në rrugë drejt dyqaneve të zinxhirit Costco në shtetet Illinois dhe Minnesota. Ngjarja ka ndodhur gjatë transportit nga Massachusetts, por kamioni nuk mbërriti kurrë në destinacion.
Sipas kompanisë logjistike Rexing Companies me bazë në Indiana, ngarkesa u mor në qytetin Taunton, por më pas u zhduk pa gjurmë. Drejtori ekzekutiv i kompanisë, Dylan Rexing, deklaroi se gjithçka tregon për një vjedhje të organizuar nga grupe kriminale që synojnë mallra me vlerë të lartë gjatë transportit.
Rexing theksoi se grabitjet e ngarkesave janë kthyer në një problem serioz në mbarë vendin, duke dëmtuar drejtpërdrejt bizneset dhe duke ndikuar në rritjen e çmimeve për konsumatorët. Rasti i karavidheve konsiderohet tipik për mënyrën sesi veprojnë këto rrjete, të cilat përfitojnë nga dobësitë në zinxhirin e furnizimit.
Hetimet për këtë ngjarje janë marrë në dorë nga FBI, ndërsa deri tani nuk është njoftuar për ndonjë arrestim. Autoritetet po shqyrtojnë mundësinë që grabitja të lidhet me një rrjet më të gjerë vjedhjesh të mallrave në tranzit.
Sipas autoriteteve federale, vjedhjet e ngarkesave shkaktojnë humbje vjetore që shkojnë nga 15 deri në 35 miliardë dollarë në ekonominë amerikane. Këto grupe shpesh godasin në pika kyçe si porte, ndalesa kamionësh apo qendra shpërndarjeje dhe në disa raste lidhen me aktivitete të tjera kriminale, përfshirë trafikun e drogës dhe kontrabandën.
Rasti i karavidheve të zhdukura ka shtuar shqetësimet për sigurinë e zinxhirit të furnizimit në SHBA, ndërsa autoritetet po kërkojnë masa më të forta për të parandaluar grabitje të tilla që dëmtojnë si bizneset, ashtu edhe konsumatorët.
About the Author
