Inteligjenca artificiale kërkon falje për dështimin e filtrave, kritikat rriten ndaj platformës dhe qëndrimit të pronarit të saj
Një valë reagimesh dhe indinjate ka shpërthyer në rrjetin social X, pas zbulimit të një trendi shqetësues ku përdoruesit i kërkojnë chatbotit Grok të vendosë gra dhe vajza në bikini apo skena seksualizuese, shpesh pa pëlqimin e tyre. Situata u bë edhe më e rëndë pasi vetë Grok pranoi se në disa raste ka gjeneruar imazhe të seksualizuara që përfshinin edhe të mitur.
Ndërsa inteligjenca artificiale e zhvilluar nga kompania xAI kërkoi publikisht falje për atë që e quajti një dështim serioz të mekanizmave mbrojtës, pronari i platformës, Elon Musk, zgjodhi një qasje krejt tjetër. Ai ironizoi trendin duke e përdorur vetë, duke i kërkuar Grok të vendoste bikini fillimisht mbi një raketë SpaceX dhe më pas mbi veten e tij, gjë që u interpretua nga shumëkush si mungesë ndjeshmërie ndaj një çështjeje tepër serioze.
Grok, chatboti i integruar në X, pranoi se më 28 dhjetor 2025 kishte krijuar dhe shpërndarë imazhe të vajzave të reja, të veshura në mënyrë seksualizuese, pas kërkesave të përdoruesve. Në një deklaratë të drejtpërdrejtë, inteligjenca artificiale tha se e “ndan përgjegjësinë morale” për dëmin e shkaktuar dhe se po rishikon filtrat për të parandaluar raste të tilla në të ardhmen.
Trendi i ashtuquajtur “bikini” ka zbuluar një dobësi serioze në politikat e sigurisë së platformës X. Përdoruesit kanë zbuluar se mjafton t’i përgjigjen një fotografie dhe t’i kërkojnë Grok-ut të “heqë rrobat” apo “ta vendosë personin në bikini”, dhe sistemi shpesh i plotëson këto kërkesa. Në disa raste, kërkesat janë bërë edhe më ekstreme, duke shtuar elementë erotikë dhe të dhunshëm.
Reagimet nga gratë dhe aktivistët për të drejtat digjitale kanë qenë të ashpra. Shumë prej tyre kanë denoncuar faktin se fotot e tyre po përdoren pa leje për fantazi seksuale, ndërsa disa përdorues meshkuj kanë justifikuar sjelljen, duke argumentuar se publikimi i fotove në internet përfshin rreziqe.
Kritikat janë shtuar edhe ndaj drejtimit të platformës X dhe rolit të pronarit të saj. Në vend që të adresojë shqetësimet për abuzimin, mbrojtjen e të miturve dhe sigurinë online, qëndrimi ironik i Musk ka nxitur akuza se platforma po normalizon sjellje të rrezikshme dhe të papranueshme.
Skandali ka rikthyer debatin mbi etikën e inteligjencës artificiale, përgjegjësinë e kompanive teknologjike dhe kufijtë e lirisë së shprehjes në rrjetet sociale, veçanërisht kur në lojë janë siguria dhe dinjiteti i fëmijëve dhe grave në internet.
About the Author
