Kryebashkiaku i Nju Jorkut dhe figura të majta amerikane dënojnë ndërhyrjen në Venezuelë si shkelje të ligjit ndërkombëtar
Kryebashkiaku i Nju Jorkut, Zohran Mamdani, ka reaguar ashpër pas kapjes së ish-presidentit venezuelian Nicolás Maduro nga forcat amerikane, duke e cilësuar operacionin një akt lufte dhe një shkelje të rëndë të së drejtës ndërkombëtare.
Mamdani deklaroi se e kishte telefonuar personalisht presidentin Donald Tramp për t’i shprehur kundërshtimin e tij të drejtpërdrejtë ndaj arrestimit të Maduros dhe bashkëshortes së tij, Cilia Flores. Sipas tij, veprimi i SHBA-së përfaqëson një përpjekje të hapur për ndryshim regjimi dhe cenon parimet themelore të sovranitetit shtetëror.
Ai theksoi se një sulm i njëanshëm ndaj një shteti sovran nuk ka pasoja vetëm jashtë vendit, por ndikon drejtpërdrejt edhe në qytetin e Nju Jorkut, ku jetojnë dhjetëra mijëra venezuelianë. Sipas Mamdanit, tensionet e krijuara rrezikojnë sigurinë dhe stabilitetin e komuniteteve emigrante.
Në të njëjtën linjë reagoi edhe kongresistja Alexandria Ocasio-Cortez, e cila hodhi dyshime mbi motivet reale të ndërhyrjes amerikane, duke deklaruar se ajo nuk lidhet me luftën kundër drogës, por me interesat energjetike dhe politikën e ndryshimit të pushtetit në Venezuelë.
Kritika të forta erdhën edhe nga guvernatorja e Nju Jorkut, Kathy Hochul, e cila e quajti operacionin një abuzim flagrant me pushtetin për shkak se u krye pa miratimin e Kongresit amerikan.
Debati rreth arrestimit të Maduros po thellohet çdo orë, duke e kthyer ndërhyrjen në Venezuelë jo vetëm në një krizë ndërkombëtare, por edhe në një përplasje të fortë politike brenda vetë Shteteve të Bashkuara.
About the Author
