Pheniani rrit tensionet globale pas operacionit amerikan kundër Maduro-s, Seuli, Uashingtoni dhe Tokio në gatishmëri
Koreja e Veriut ka kryer lëshimin e parë raketor për vitin 2026, duke hedhur disa raketa balistike drejt ujërave lindore, në një veprim që shihet gjerësisht si mesazh politik ndaj Shteteve të Bashkuara pas ndërhyrjes ushtarake amerikane në Venezuelë dhe kapjes së ish-presidentit Nicolás Maduro.
Sipas autoriteteve të Koresë së Jugut, raketat u lëshuan rreth orës 07:50 të mëngjesit nga zona e kryeqytetit të Koresë së Veriut, pa u dhënë detaje mbi distancën e fluturimit. Shtabi i Përbashkët i Forcave të Armatosura të Seulit bëri të ditur se ka forcuar monitorimin dhe po shkëmben informacione në kohë reale me Shtetet e Bashkuara dhe Japoninë. Edhe Ministria e Mbrojtjes e Japonisë konfirmoi se ka identifikuar lëshime të dyshuara raketore, pa raportime për dëme.
Lëvizja e Phenianit vjen në një moment delikat gjeopolitik, vetëm pak orë pasi SHBA ndërmorën një operacion ushtarak në Caracas, bombarduan objektiva strategjike dhe arrestuan Maduro-n dhe bashkëshorten e tij. Presidenti amerikan Donald Tramp ka deklaruar se Uashingtoni synon të administrojë përkohësisht Venezuelën deri në një tranzicion që e quan të sigurt dhe të kontrolluar.
Koreja e Veriut dhe Venezuela kanë ruajtur marrëdhënie të ngushta për dekada, të bazuara në kundërshtimin e përbashkët ndaj politikave amerikane. Caracas hapi ambasadën e saj në Phenian në vitin 2019, ndërsa Koreja e Veriut mban përfaqësi diplomatike në Venezuelë që prej vitit 2014, duke e konsideruar vendin latino-amerikan një aleat strategjik.
Reagimet ndërkombëtare ndaj veprimeve amerikane kanë qenë të forta. Kina ka akuzuar SHBA-në për sjellje hegjemoniste, ndërsa Rusia e ka cilësuar operacionin në Venezuelë si akt agresioni të armatosur. Në këtë klimë tensioni, lëshimi i raketave nga Koreja e Veriut shihet si një sinjal paralajmërues se kriza venezueliane mund të ketë pasoja shumë më të gjera në arenën globale.
Ndërkohë, autoritetet në Azi-Paqësor vijojnë të qëndrojnë në gatishmëri të lartë, nga frika se përshkallëzimi i tensioneve mes fuqive të mëdha mund të shndërrohet në një krizë të re sigurie ndërkombëtare.
About the Author
