Nga taksia te pika e karburantit, një i ri terrorizon Fushë-Krujën me dy grabitje brenda ditës

 I riu grabit taksinë dhe më pas pikën e karburantit, policia në kërkim për kapjen e autorit

Dy episode grabitjeje janë regjistruar paraditen e sotme në aksin që lidh Tirana me Fushë-Krujë, ku një i ri ka vepruar në dy raste të ndara, duke shkaktuar alarm tek qytetarët dhe autoritetet.

Sipas informacioneve paraprake, i dyshuari fillimisht ka ndaluar një taksi në Tiranë, duke kërkuar të dërgohej drejt Fushë-Krujës. Gjatë rrugës, në afërsi të Tapizë, ai ka kërcënuar taksistin dhe i ka marrë automjetin, paratë dhe celularin, për ta lënë më pas shoferin në një zonë të izoluar.

Pas këtij episodi, i riu është ndalur në një pikë karburanti pranë Milot, ku ka kërcënuar punonjësit dhe ka marrë shumën e parave të xhiros ditore. Automjeti i grabitur është gjetur i braktisur më vonë pranë një xhamie në Fushë-Krujë, ndërsa autori është larguar nga vendngjarja.

Policia ka identifikuar tashmë të dyshuarin dhe po vijon hetimet intensive për lokalizimin dhe arrestimin e tij, ndërsa pritet që në orët në vijim të ketë informacion zyrtar mbi ecurinë e çështjes.