Kremlini përfiton në heshtje nga ndërhyrja amerikane, por frika se mund të jetë i radhës mbetet reale
Heshtja e presidentit rus Vladimir Putin pas arrestimit spektakolar të presidentit venezuelian Nicolás Maduro nga forcat amerikane ka ngritur pikëpyetje të forta në qarqet diplomatike dhe analitike ndërkombëtare. Ndërsa Ministria e Jashtme e Rusisë e cilësoi operacionin amerikan si një akt të papranueshëm agresioni të armatosur, vetë Putini ka shmangur çdo deklaratë publike, duke zgjedhur një strategji të heshtjes.
Sipas ekspertëve të marrëdhënieve ndërkombëtare, kjo qasje nuk është rastësore. Nga njëra anë, humbja e Madurros përbën një goditje simbolike për prestigjin e Moskës, pasi ai konsiderohej aleati më besnik i Rusisë në Amerikën Latine. Nga ana tjetër, Kremlini sheh në veprimin e Uashingtonit një precedent të ri global, ku forca zëvendëson sovranitetin dhe të drejtën ndërkombëtare.
Analistë pranë qarqeve akademike europiane vlerësojnë se Rusia mund të përfitojë në plan afatgjatë, duke kërkuar më shumë liri veprimi në Ukrainë dhe në hapësirën post-sovjetike, në këmbim të mbylljes së syve ndaj asaj që ndodhi në Venezuelë. Disa madje sugjerojnë se çështja e Maduros mund të jetë diskutuar më herët në takime të fshehta mes Vladimir Putin dhe Donald Tramp, si pjesë e një rishpërndarjeje globale të sferave të ndikimit.
Një tjetër element që shqetëson Kremlinin është rrjedhja e informacionit. Sipas ekspertëve të sigurisë, fakti që operacioni amerikan rezultoi i suksesshëm nënkupton se dikush nga rrethi i ngushtë i Maduros ka bashkëpunuar me SHBA-në. Kjo ka shtuar frikën në Moskë për infiltrime të ngjashme, duke e bërë Putinin edhe më paranojak për sigurinë personale dhe besnikërinë e elitës përreth tij.
Ndërkohë, propaganda pro-Kremlinit po e përdor arrestimin e Maduros për të forcuar narrativën e “imperializmit amerikan”, duke e paraqitur ngjarjen si pjesë të një plani më të gjerë kundër Rusisë. Megjithatë, analistët theksojnë se Putini nuk do të fitojë automatikisht afrim politik me Trampin vetëm duke heshtur, pasi mosbesimi mes dy liderëve mbetet i thellë.
Në thelb, rasti i Maduros shërben si paralajmërim i heshtur për Kremlinin: në një botë ku fuqia po imponohet mbi rregullat, as aleancat e vjetra dhe as retorika e miqësisë së përjetshme nuk garantojnë mbrojtje. Dhe kjo është arsyeja pse Putini, për momentin, po zgjedh të heshtë.
About the Author
