Shirat intensive shtojnë prurjet e lumit, autoritetet ndjekin situatën nga afër
Reshjet e dendura të shiut të rëna gjatë orëve të fundit kanë sjellë rritje të ndjeshme të nivelit të lumit Lana në Tiranë, duke ngritur shqetësime për një situatë potencialisht problematike në zonat përreth shtratit të tij.
Sasia e madhe e ujit ka bërë që prurjet e Lanës të shtohen dukshëm përgjatë gjithë gjatësisë së lumit. Megjithatë, deri në këto momente, uji vijon të rrjedhë brenda shtratit, pa kaluar kufijtë mbrojtës.
Ndërkohë, moti i keq ka shkaktuar probleme edhe në zona të tjera të vendit. Në Selenicë, reshjet kanë dëmtuar segmente rrugore dhe dy banesa, ndërsa Lumi Vjosa ka dalë nga shtrati në disa pjesë, duke krijuar vështirësi për banorët.
Autoritetet lokale dhe strukturat e emergjencave civile po monitorojnë nga afër situatën në të gjithë territorin, ndërsa u bëhet thirrje qytetarëve të tregojnë kujdes dhe të shmangin zonat pranë lumenjve për shkak të rrezikut nga rritja e mëtejshme e nivelit të ujit.
About the Author
