Ambasadori i Ukrainës në Shqipëri Volodymyr Shukrov, ka pësuar një atak kardiak gjatë një vizite në Voskopojë, duke shkaktuar alarm dhe reagim të menjëhershëm nga autoritetet shëndetësore.

Ngjarja ka ndodhur gjatë fundjavës, teksa diplomati ukrainas ndodhej në një vizitë private në zonën turistike të Voskopojës, në Korçë. Sipas burimeve mjekësore, ai ka shfaqur shenja të forta të një infarkti akut dhe është transportuar menjëherë drejt spitalit rajonal të Korçës.

Mjekët kanë ndërhyrë për të stabilizuar gjendjen e tij, ndërsa më pas është vendosur që ambasadori të transferohet drejt Tiranës për trajtim të specializuar.

Autoritetet shqiptare kanë ofruar ndihmën e tyre të plotë, ndërsa Ministria e Jashtme e Shqipërisë ka shprehur solidaritet dhe gatishmëri për mbështetje.

Gjendja shëndetësore e ambasadorit po monitorohet nga afër dhe pritet një njoftim zyrtar nga ambasada e Ukrainës në Tiranë mbi ecurinë e mëtejshme të trajtimit.