Pas protestave të dhunshme që lanë të paktën 72 të vdekur në Katmandu, kryeministrja e re në detyrë e Nepalit, Sushila Karki, është zotuar të punojë në përputhje me kërkesat e gjeneratës së re dhe të vendit për ndryshim.

Të dielën, më 14 shtator, Sushila Karki, ish-kryetare e Gjykatës së Lartë dhe tani në krye të qeverisë provizore, pas dorëheqjes së ish-kryeministrit KP Sharma Oli, tha se duhet të punojmë në përputhje me mendimin e gjeneratës Z, duke nënvizuar se kërkesa e qytetarëve është e qartë: fund korrupsionit, qeverisje e mirë dhe barazi ekonomike.

Në fjalën e saj të parë publike si kryeministre, Karki mbajti një minutë heshtje për viktimat dhe i quajti këto ngjarje “kriza më e rëndë që nga rrëzimi i monarkisë në vitin 2008”. Ajo theksoi gjithashtu se qeveria e përkohshme nuk do të zgjasë më shumë se gjashtë muaj, pasi zgjedhjet parlamentare janë caktuar për 5 mars 2026.

Kryeministrja e re filloi menjëherë një seri takimesh në kompleksin qeveritar Singha Durbar në Katmandu, i cili u dëmtua rëndë nga zjarret e ndezura gjatë protestave.

Me këtë premtim për ndryshim dhe përballë krizës më të rëndë politike e shoqërore të vendit, Sushila Karki përballet me një sfidë historike: rikthimin e besimit të popullit në institucionet e Nepalit.