Giorgio Armani, mjeshtri i elegancës italiane që e shndërroi emrin e tij në një simbol global mode dhe stili, ka lënë pas një testament që po komentohet gjerësisht në Itali. Përveç pasurisë së madhe të markës që mbart vulën e tij, në dokumentin e fundit ligjor të stilistit shfaqet një emër surprizë: Michele Morselli, 42 vjeç, administrator i përgjithshëm i shoqërisë Immobiliare Srl.

Besnikëria që shpërblehet me miliona

Morselli nuk është një figurë e njohur në pasarela, por në botën e biznesit dhe të administrimit të aseteve luksoze. Prej vitesh ai ka menaxhuar portofolin e pasurive të paluajtshme të Armanit, ku përfshihen vila madhështore në Saint-Tropez, Pantelleria, Antigua, Broni dhe New York, me një vlerë neto prej rreth 289 milionë eurosh.

Për besnikërinë dhe punën e tij, Armani i ka lënë Morsellit një trashëgimi të veçantë:

Obligacione shtetërore italiane (BTP) me vlerë afro 32 milionë euro,Aksione të EssilorLuxottica me vlerë mbi 26 milionë euro si dhe një pjesë të pasurisë personale, përfshirë automjete historike të koleksionit të tij privat.

Testament që pasqyron filozofinë e stilistit

Ky veprim tregon edhe një herë filozofinë e Giorgio Armanit: eleganca nuk është vetëm në rrobat që ai krijoi, por edhe në mënyrën se si vendosi të shpërndajë trashëgiminë e tij. Përtej shifrave marramendëse, testamenti është një dëshmi e mirënjohjes për njerëzit që i qëndruan pranë dhe që kontribuuan në ruajtjen e perandorisë së tij.