Artisti 63-vjeçar humbi jetën në një aksident të rëndë automobilistik në Los Angeles, familja flet për një trashëgimi të paharrueshme.
Bota e argëtimit është tronditur nga lajmi i ndarjes nga jeta të kompozitorit të njohur të Nickelodeon, Guy Moon, i cili humbi jetën në moshën 63-vjeçare pas një aksidenti të rëndë automobilistik në Los Angeles.
Sipas raportit të Zyrës së Mjekësisë Ligjore të Qarkut Los Angeles, Moon u përfshi në një përplasje rrugore dhe ndërroi jetë si pasojë e dëmtimeve të rënda traumatike. Ngjarja e rëndë ka ndodhur mëngjesin e së enjtes, duke lënë pas dhimbje të thellë te familjarët, miqtë dhe komuniteti artistik.
Familja e tij, në një reagim prekës, u shpreh se ndihet e thyer nga dhimbja, por edhe e bekuar që pati fatin ta kishte bashkëshort dhe baba. Ata theksuan se Guy Moon ka lënë pas një trashëgimi të qartë dhe të pashlyeshme, jo vetëm për ta, por edhe për mijëra njerëz që janë prekur nga muzika dhe puna e tij gjatë dekadave.
Guy Moon ishte i nominuar disa herë për çmimin Emmy dhe ishte një nga emrat më të rëndësishëm pas muzikës së disa prej serialeve më të dashura për publikun. Ai kontribuoi për vite me radhë në produksione të njohura të rrjetit Nickelodeon, si The Fairly OddParents, Danny Phantom, Big Time Rush dhe SpongeBob SquarePants.
Ndër krijimet e tij më të njohura përfshihen këngë që u kthyen në ikona për breza të tërë, si Bartmania, Shiny Teeth dhe tema muzikore e serialit Danny Phantom. Për punën e tij në The Fairly OddParents, Moon u nominua katër herë radhazi për Emmy në kategorinë Muzika dhe Tekstet më të Mira.
Krijuesi i serialit The Fairly OddParents, Butch Hartman, reagoi i tronditur nga lajmi, duke e cilësuar Guy Moon jo vetëm si bashkëpunëtor, por si mik dhe familje, ndërsa shumë artistë të tjerë të njohur kanë shprehur publikisht dhimbjen dhe respektin për figurën e tij.
I lindur në Wisconsin në vitin 1962, Guy Moon studioi muzikë në Universitetin e Arizonës përpara se të zhvendosej në Kaliforni. Karriera e tij përfshin mbi 70 projekte në film, seriale televizive dhe animacione, duke e bërë atë një nga kompozitorët më produktivë dhe më të dashur të industrisë.
Ndarja e tij nga jeta lë një boshllëk të madh në botën e muzikës televizive, por vepra dhe ndikimi i Guy Moon do të vijojnë të jetojnë përmes melodive që shoqëruan fëmijërinë dhe kujtimet e miliona shikuesve në mbarë botën.
About the Author
