Ndërsa në Kargil zhvillohen protesta pro udhëheqjes iraniane, familjet e rreth 1.500 studentëve nga Jammu dhe Kashmir apelon qeverinë indiane për ndërhyrje humanitare mes krizës në Iran
Qindra persona kanë dalë në protesta në Kargil për të shprehur mbështetjen ndaj udhëheqësit suprem të Iranit, Ajatollah Ali Khamenei, në një kohë kur në vetë Iranin vijojnë demonstratat kundër regjimit. Tubimi u shoqërua me thirrje politike dhe valëvitje të flamujve indianë dhe iranianë, ndërsa protestuesit vendosën edhe arkivole simbolike me emrat e presidentit amerikan Donald Tramp dhe kryeministrit izraelit Benjamin Netanyahu, duke i akuzuar për ndërhyrje në rajon. Autoritetet lokale raportuan se protesta u zhvillua pa incidente dhe nën masa të shtuara sigurie.
Paralelisht me këto zhvillime, shqetësimi është rritur ndjeshëm në Jammu dhe Kashmir, ku prindërit e studentëve që studiojnë në Iran kanë bërë thirrje publike për evakuimin e menjëhershëm të fëmijëve të tyre. Apeli vjen pas njoftimit të qeverisë indiane, e cila u ka kërkuar shtetasve të saj të largohen sa më parë nga Irani për shkak të situatës së paqëndrueshme.
Sipas prindërve, komunikimi me studentët është pothuajse i pamundur për shkak të ndërprerjeve të internetit dhe linjave telefonike. Disa familjarë kanë deklaruar se ambasada u ka kërkuar studentëve të largohen me mjete personale, pa asistencë të mëtejshme institucionale, gjë që e bën procesin edhe më të vështirë.
Një prej prindërve, Suhail Qadri, ka deklaruar se fëmijët e tij ndodhen në Iran dhe se prej ditësh nuk ka pasur asnjë kontakt të qëndrueshëm me ta. Ai theksoi se situata është alarmante dhe se pa ndihmën e shtetit është e pamundur të organizohet kthimi i tyre i sigurt. Edhe prindër të tjerë kanë bërë thirrje që Ministria e Punëve të Jashtme e Indisë të ndërhyjë përmes ambasadës, duke u shprehur të gatshëm të mbulojnë shpenzimet, por duke kërkuar koordinim zyrtar.
Sipas të dhënave, rreth 1.500 studentë nga Jammu dhe Kashmir ndodhen aktualisht në universitete dhe kolegje mjekësore në Iran. Kriza ka nxjerrë në pah kontrastin mes qëndrimeve politike të protestuesve në Kargil dhe ankthit të thellë të familjeve që kërkojnë vetëm sigurinë dhe kthimin e fëmijëve të tyre.
About the Author
