“Kam bombë, të gjithë do të vdesin”: Hotspot WiFi shkakton alarm në fluturimin e Turkish Airlines

 Një hotspot WiFi me mesazh kërcënues aktivizon protokollet e NATO-s, pasagjerët evakuohen nën masa të rrepta sigurie

Një fluturim i Turkish Airlines është detyruar të kryejë ulje emergjente në aeroportin Barcelona-El Prat Airport, pasi në bord u identifikua një kërcënim serioz që u trajtua si rrezik terrorist.

Sipas autoriteteve, incidenti u shkaktua nga një pasagjer që kishte aktivizuar një hotspot personal WiFi me emrin kërcënues se kishte bombë dhe se të gjithë do të vdisnin. Ky mesazh u zbulua gjatë fluturimit dhe menjëherë vuri në lëvizje protokollet e sigurisë ajrore.

Avioni, i nisur nga Stambolli, u shoqërua nga avionë luftarakë spanjollë dhe francezë mbi Detin Mesdhe, pasi alarmi u identifikua në hapësirën ajrore pranë brigjeve të Italisë. Si pjesë e reagimit të shpejtë, forcat ajrore franceze ngritën avionë luftarakë, çka shkaktoi edhe shpërthime zanore në disa rajone të Francës jugore.

Pas uljes në Barcelonë, 148 pasagjerë dhe 7 anëtarë të ekuipazhit u evakuuan menjëherë, ndërsa forcat e sigurisë dhe Garda Civile spanjolle kontrolluan avionin në detaje për lëndë shpërthyese. Operacioni u zhvillua nën masa të larta sigurie dhe pista u izolua përkohësisht.

Autoritetet konfirmuan se kërcënimi ishte i rremë, por rasti u trajtua si rrezik maksimal, në përputhje me protokollet e NATO-s për kërcënime të mundshme terroriste në hapësirën ajrore europiane.

Ngjarja ka ngritur sërish shqetësime për sigurinë ajrore dhe keqpërdorimin e teknologjisë nga individë të papërgjegjshëm, ndërsa hetimet vijojnë për identifikimin dhe ndëshkimin e personit përgjegjës për alarmimin e rremë.