Në vitin 2024, indeksi S&P 500 u rrit me 24%, ku gati gjysma e fitimeve u përqendrua te “të mrekullueshmit shtatë”: Meta, Amazon, Google, Microsoft, Nvidia, Tesla dhe Apple. Ky hov u shty kryesisht nga investimet rekord në inteligjencën artificiale, me pesë kompanitë kryesore që parashikohen të shpenzojnë mbi 560 miliardë dollarë deri në fillim të vitit 2026. Megjithatë, kthimi financiar deri më tani ka qenë i ulët – vetëm rreth 35 miliardë dollarë të ardhura.

Sipas The Atlantic, shpenzimet e bizneseve për AI kanë kontribuar më shumë në rritjen e PBB-së amerikane gjatë gjysmës së parë të vitit 2025 sesa shpenzimet e konsumatorëve. Por mospërputhja mes investimeve gjigante dhe përfitimeve të kufizuara po krijon tensione. Për të kënaqur investitorët, kompanitë po shkurtojnë vende pune, po ngrijnë punësimet e reja dhe po përqendrohen te fitimet afatshkurtra, ndërsa produktiviteti qëndron i pandryshuar.

Ekonomistët paralajmërojnë se kjo dinamikë mund të trondisë ekonominë më gjerë: papunësia në rritje pa rritje të efikasitetit, një skenar i ngjashëm me “bumin” e email-it në vitet e para, që ngadalësoi punën në vend se ta përshpejtonte. Por ndryshe nga email-i, investimet e sotme në AI përbëjnë një pjesë të madhe të bursës amerikane – dhe nëse sektori dështon, rrezikon ta tërheqë me vete gjithë ekonominë.