Pas përplasjes fatale mes dy trenave pranë Adamuzit, të mbijetuarit rrëfejnë skena kaosi, dhimbjeje dhe humbjesh që nuk harrohen
Një nga aksidentet më të rënda hekurudhore në Spanjë ka lënë pas dhjetëra viktima dhe qindra të plagosur, ndërsa dëshmitë e të mbijetuarve përshkruajnë momente tmerri që do t’i shoqërojnë për gjithë jetën. Dy trena janë përplasur mbrëmjen e së dielës pranë stacionit të Adamuzit, afër Kordobës, duke shkaktuar një bilanc tragjik me të paktën 39 viktima dhe mbi 150 të plagosur, 24 prej tyre në gjendje të rëndë.
Rocío Flores, 30 vjeçe, avokate dhe një nga të mbijetuarat, ishte në trenin e linjës Madrid–Huelva. Ajo tregon se gjithçka ndodhi brenda pak sekondash. Treni frenoi papritur, sediljet u shkëputën dhe pasagjerët u hodhën në ajër nga përplasja. Ajo ndodhet e shtruar në spital në Kordobë, nën vëzhgim për goditje në kokë dhe të vjella, me brinjë të zhvendosura dhe trupin plot mavijosje. Sipas saj, ishte një kaos total dhe shumë persona ndodheshin në gjendje shumë më të rëndë.
Edhe pasagjerë të tjerë kanë përshkruar skena të ngjashme. Një grua tjetër ka deklaruar se në ato momente mendoi se do të vdiste, ndërsa valixhet dhe sendet personale binin mbi njerëzit. Kur arritën të dilnin nga vagonët, u përballën me një pamje katastrofike, me të plagosur kudo dhe njerëz që kërkonin ndihmë.
Një tjetër dëshmi prekëse vjen nga Ana, një e re e intervistuar nga një televizion lokal, e cila rrëfeu mes lotësh se kishte njerëz përballë saj që po jepnin shpirt dhe se nuk mund të bënte asgjë për t’i ndihmuar. Motra e saj u nxor nga rrënojat nga zjarrfikësit dhe u dërgua në spital, ndërsa Ana humbi edhe qenin e saj, të cilin e konsideronte pjesë të familjes.
Sipas autoriteteve spanjolle, përplasja ndodhi rreth orës 19:45, kur një tren privat që udhëtonte nga Malaga drejt Madridit doli nga shinat dhe u përplas me trenin e linjës Madrid–Huelva të kompanisë shtetërore Renfe. Dy vagonët e parë dolën nga shinat, duke shkaktuar pasoja shkatërrimtare.
Ministri i Transportit ka deklaruar se numri i viktimave nuk është ende përfundimtar, ndërsa hetimet po vijojnë për të zbardhur shkaqet e aksidentit. Ndërkohë, Spanja është zhytur në zi, ndërsa rrëfimet e të mbijetuarve dëshmojnë për një natë që do të mbetet e pashlyeshme në kujtesën kolektive.
About the Author
