Mësuesja Fiona Beal vrau partnerin e saj Nicholas Billingham dhe e fshehu krimin për muaj të tërë, para se gjithçka të zbulohej nga ditarët e saj
Një nga krimet më tronditëse të viteve të fundit në Mbretërinë e Bashkuar ka rikthyer vëmendjen pas rrëfimit rrëqethës të nënës së viktimës, e cila zbuloi se kishte kaluar kohë me autoren e krimit, pa e ditur se djali i saj ishte i vdekur dhe i varrosur pak metra larg.
42-vjeçari Nicholas Billingham u vra në shtëpinë e tij në Northampton nga partnerja e tij, mësuesja e shkollës fillore Fiona Beal, në nëntor të vitit 2021. Për muaj me radhë, Beal arriti të mashtrojë familjen, miqtë dhe kolegët, duke krijuar histori të rreme sikur Nicholas kishte lënë shtëpinë dhe ishte zhvendosur me një grua tjetër.
Nëna e viktimës, Yvonne Valentine, tregoi se gjatë periudhës së Krishtlindjeve kishte vizituar Fiona Beal, kishte pirë pije me të dhe kishte shkëmbyer përqafime, pa e ditur se trupi i djalit të saj ishte varrosur në kopshtin e shtëpisë. Ajo mori edhe mesazhe të rreme nga telefoni i Nicholas, të cilat në fakt dërgoheshin nga Fiona, për të mbajtur gjallë mashtrimin.
Hetimet zbuluan se Fiona Beal kishte dokumentuar gjithçka në ditarë personalë, ku përshkruante një personalitet tjetër, të cilin e quante Tulip 22. Këto shënime u kthyen në prova kyçe për policinë, pasi përmbanin detaje që çuan në zbardhjen e plotë të krimit.
Trupi i Nicholas Billingham u gjet i fshehur në kopsht, pas dyshimeve të policisë për sjelljen e pazakontë të Beal dhe pas raportimit të zhdukjes së viktimës. Ajo u arrestua fillimisht pas një episodi në një resort, ku u gjet me plagë në duar, ndërsa ditarët e saj zbuluan gjithçka.
Pas një procesi të gjatë gjyqësor, Fiona Beal pranoi fajësinë për vrasje dhe në vitin 2024 u dënua me burgim të përjetshëm, me një minimum prej 20 vitesh për të vuajtur. Rasti është rikthyer në vëmendje edhe përmes dokumentarit televiziv Killer In The House: Nicholas Billingham, që transmetohet në ITV.
Ngjarja ka tronditur opinionin publik britanik, duke ngritur pikëpyetje të forta mbi maskat që njerëzit mund të mbajnë dhe mënyrën se si një krim mund të fshihet për muaj të tërë, edhe përballë familjarëve më të afërt të viktimës.
About the Author
