Fjalëkalime të dobëta, email-e të hapura dhe dyshime për rrjedhje të dosjeve sensitive, hetimi nxjerr në pah një skandal serioz sigurie në Prokurorinë e Posaçme
Detaje të reja tronditëse janë zbuluar nga dosja hetimore që lidhet me ndërhyrjen e paligjshme në sistemet kompjuterike të disa prokurorëve të SPAK, një çështje që ka ngritur shqetësime serioze për sigurinë e informacionit në institucionin më të rëndësishëm të drejtësisë.
Sipas emisionit investigativ Në Shënjestër, gjatë periudhës shkurt–mars të vitit të kaluar, kompjuteri i ish-drejtuesit të SPAK, Altin Dumani, është tentuar të hakërohet plot 425 herë. Tentativat e përsëritura kanë qenë të përqendruara në aksesimin e email-eve dhe të dhënave personale të tij.
Pak ditë më parë, SPAK dërgoi për gjykim dosjen në fjalë, ku të pandehur janë Agim Ismaili, ish-drejtor i Përgjithshëm i Burgjeve, si edhe dy persona të tjerë, Zambak Gjoni dhe Arnold Rrokaj. Hetimet kanë zbuluar se në shënjestër të grupit ka qenë edhe drejtuesi aktual i SPAK, Klodian Braho.
Sipas gazetarit Xhevair Zhabrina, një element kyç që ka lehtësuar ndërhyrjen ka qenë përdorimi i fjalëkalimeve shumë të thjeshta nga disa prokurorë. Nga dëshmia e Arnold Rrokajt në SPAK rezulton se ai ka arritur të hyjë në email-et e tre prokurorëve duke përdorur të njëjtin fjalëkalim Spak@2019.
Në dëshminë e tij, Rrokaj shpjegon se pasi arriti të hapë një email, provoi edhe dy përdorues të tjerë, të cilët u hapën me të njëjtin kod. I shtyrë nga kureshtja, ai ka parë materialet e dërguara dhe të marra në këto email-e, disa prej të cilave i ka ruajtur në telefonin e tij celular, ndërsa të tjera i ka fshirë më pas.
Hetimet tregojnë se përmes këtij hakerimi, të pandehurit dyshohet se kanë siguruar materiale hetimore sensitive, përfshirë dokumente që lidhen me çështje penale të një rëndësie të lartë. Kjo ka ngritur dyshime serioze për cenimin e sekretit hetimor dhe rrezikimin e proceseve në vijim.
Sipas burimeve, interesi kryesor i ndërhyrjes ka qenë që Agim Ismaili të mësonte nëse kishte ndonjë hetim të hapur ndaj eprorit të tij në atë kohë, ministrit të Drejtësisë, Ulsi Manja.
Skandali ka vënë në pikëpyetje masat e sigurisë kibernetike në SPAK dhe ka hapur një debat të fortë mbi mbrojtjen e të dhënave dhe përgjegjësinë institucionale në rastet e cenimit të sistemeve informatike të drejtësisë.
About the Author
