Presidentja e Kosovës bën homazhe në Velani dhe thekson se vizioni i Rugovës për liri, demokraci dhe integrim euroatlantik mbetet udhërrëfyes për brezat
Këtë të mërkurë shënohen 20 vite nga ndarja nga jeta e ish-presidentit historik të Kosovës, Ibrahim Rugova. Me këtë rast, Presidentja e Republikës së Kosovës, Vjosa Osmani, së bashku me familjen Rugova, kanë kryer homazhe pranë varrit të tij në Velani.
Gjatë ceremonisë përkujtimore, Osmani e cilësoi Rugovën si atin themeltar të Republikës së Kosovës dhe arkitektin e pavarësisë, duke theksuar se ai arriti të bashkojë të gjithë popullin rreth kauzës për liri, pavarësi dhe demokraci, një vizion që sipas saj vazhdon të jetë i gjallë edhe sot.
Presidentja u shpreh se vizioni politik dhe diplomatik i Rugovës ishte vendimtar në ndërtimin e aleancave strategjike të Kosovës me vendet euroatlantike, duke e orientuar shtetin drejt integrimit në strukturat perëndimore. Ajo theksoi se ky vizion mbetet një dritë udhërrëfyese për çdo qytetar dhe institucion që synon një Kosovë më të fortë dhe më të integruar ndërkombëtarisht.
Osmani nënvizoi gjithashtu se liria dhe shtetësia e Kosovës janë jetësuar falë sakrificës së popullit, luftës çlirimtare dhe mbështetjes së aleatëve strategjikë, themele që, sipas saj, u hodhën me mençuri dhe këmbëngulje nga presidenti Rugova.
Në përfundim, ajo theksoi se nderimi për Ibrahim Rugovën do të jetë i përjetshëm dhe se vizioni i tij do të jetojë për aq kohë sa do të ekzistojë Kosova, si pjesë e pandarë e familjes euroatlantike.
About the Author
