Presidenti amerikan shkon në Zvicër për një përballje politike mbi Groenlandën, ndërsa BE paralajmëron një botë të re të dominuar nga forca e zhveshur
Presidenti i Shteteve të Bashkuara, Donald Tramp, ka mbërritur në Zvicër për të marrë pjesë në Forumin Ekonomik Botëror në Davos, në një moment tensionesh të forta mes SHBA-së dhe vendeve europiane lidhur me çështjen e Groenlandës. Aeroplani presidencial Air Force One u ul në Cyrih pak para mesditës, pas një vonese rreth treorëshe për shkak të një problemi të vogël elektrik.
Si pasojë e vonesës, është anuluar takimi dypalësh i planifikuar mes Trump dhe kancelarit gjerman Friedrich Merz, sipas burimeve zyrtare gjermane. Presidenti amerikan pritet të udhëtojë drejt Davosit, ku do t’i drejtohet liderëve politikë dhe ekonomikë në skenën e Forumit Ekonomik Botëror.
Mbërritja e Tramp në Evropë vjen në një klimë përplasjeje të hapur politike. Presidentja e Komisionit Europian, Ursula von der Leyen, paralajmëroi se Evropa po përballet me një rend të ri botëror të përcaktuar nga forca e zhveshur, duke kërkuar forcim të ekonomisë dhe mbrojtjes europiane për të ruajtur ndikimin global.
Von der Leyen theksoi se ndryshimi i rendit ndërkombëtar nuk është i përkohshëm, por i përhershëm, duke nënvizuar se Europa duhet të largohet nga kujdesi tradicional dhe të përgatitet për një realitet të ri gjeopolitik.
Ndërkohë, Sekretari amerikan i Thesarit, Scott Bessent, i cili ka mbërritur më herët në Davos, kritikoi ashpër reagimet e liderëve europianë ndaj kërcënimeve të Tramp për tarifa tregtare. Ai u bëri thirrje vendeve europiane të shmangin, sipas tij, zemërimin dhe hidhërimin e nxituar, duke i ftuar të dëgjojnë argumentet e presidentit amerikan.
Tramp pritet të flasë në Forumin Ekonomik Botëror mes një vëmendjeje të jashtëzakonshme ndërkombëtare, teksa Groenlanda, tarifat dhe raportet SHBA–BE pritet të jenë në qendër të përballjeve politike në Davos.
About the Author
