Presidenti i Republikës i jep dritën jeshile Kryeministrit për përfaqësimin e Shqipërisë në nismën ndërkombëtare të Bordit të Paqes, ndërsa projektligji i ratifikimit hyn në fuqi
Presidenti i Republikës, Bajram Begaj, ka autorizuar Kryeministrin Edi Rama për nënshkrimin e Marrëveshjes për Aderimin e Shqipërisë në Bordin e Paqes.
Sipas dokumentit zyrtar, autorizimi i Presidentit i hap rrugë përfaqësimit të Shqipërisë në këtë strukturë ndërkombëtare, në përputhje me kompetencat kushtetuese dhe procedurat ligjore për marrëveshjet ndërkombëtare. Marrëveshja parashikon pranimin e Republikës së Shqipërisë në Kartën e Bordit të Paqes, si pjesë e një nisme globale që synon promovimin e paqes dhe bashkëpunimit ndërkombëtar.
Ndërkohë, projektligji për ratifikimin e marrëveshjes së pranimit të Shqipërisë në Bordin e Paqes, i paraqitur në Kuvend, ka hyrë në fuqi, duke formalizuar procesin institucional për anëtarësimin e vendit në këtë mekanizëm.
Aderimi në Bordin e Paqes vjen në një moment debatesh politike të brendshme mbi përfaqësimin e shtetit shqiptar në organizata ndërkombëtare, por nga ana institucionale, autoritetet kanë vijuar procedurat sipas parashikimeve kushtetuese dhe ligjore.
Me këtë hap, Shqipëria pritet të jetë pjesë e Bordit të Paqes përmes përfaqësimit të saj zyrtar, ndërsa detajet mbi rolin konkret dhe angazhimet që do të marrë vendi në këtë strukturë pritet të sqarohen në vijim.
About the Author
