Jordan Chiedozie, ish-lojtar i Bournemouth dhe djali i një ish-futbollisti të Tottenham, mbetet me pasoja të rënda pas përplasjes në M27, ndërsa drejtësia jep verdiktin
Një ngjarje e rëndë ka tronditur botën e futbollit në Angli, pasi ish-futbollisti Jordan Chiedozie ka humbur një këmbë pas një aksidenti të tmerrshëm në autostradën M27. Ngjarja ndodhi teksa ai kishte ndaluar në korsinë e emergjencës për të kontrolluar një gomë të shfryrë, kur u përplas nga një automjet i drejtuar nga një grua nën efektin e alkoolit.
Sipas autoriteteve britanike, Anna Bogusiewicz, 45 vjeçe, është dënuar me 28 muaj burg pasi pranoi fajësinë për shkaktim të dëmtimit të rëndë trupor nga drejtimi i rrezikshëm i mjetit dhe për drejtim mjeti në gjendje të dehur. Ajo u ndalua gjithashtu nga drejtimi i automjeteve për tre vite.
Chiedozie, i cili kishte luajtur më herët për AFC Bournemouth, u dërgua në spital në gjendje kritike, u vendos në koma të induktuar dhe, për shkak të dëmtimeve të shumta, mjekët u detyruan t’i amputonin njërën këmbë. Në një deklaratë për gjykatën e Southampton, futbollisti tregoi se jeta e tij ndryshoi brenda një dite dhe falënderoi stafin mjekësor për shpëtimin e jetës.
Aksidenti ndodhi më 1 shkurt, pasi Chiedozie kishte zhvilluar një ndeshje me skuadrën Bashley FC dhe po udhëtonte së bashku me fizioterapistin e tij. Përplasja i shkaktoi atij fraktura të shumta dhe dëmtime serioze fizike, që i kanë ndryshuar përgjithmonë jetën.
Pavarësisht pasojave të rënda, ish-futbollisti ka dhënë mesazhe force dhe qëndrueshmërie, duke treguar se po mësohet gradualisht të ecë me këmbë protetike dhe se përqendrimi te e ardhmja është çelësi i rikuperimit.
Jordan Chiedozie është djali i ish-futbollistit John Chiedozie, i cili ka luajtur për Tottenham Hotspur në vitet ’80, ndërsa karriera e tij personale ka përfshirë ekipe nga ligat e ulëta angleze deri në nivele profesionale. Ngjarja ka rihapur debatin në Britani mbi pasojat tragjike të drejtimit të automjeteve nën ndikimin e alkoolit dhe rrezikun në rrugë.
About the Author
