Pas një ndjekjeje 50 milje në Kaliforni, i dyshuari hapi zjarr ndaj policisë dhe u neutralizua, një rreshter mbeti i plagosur
Një ndjekje e gjatë dhe e tensionuar ka përfunduar me vdekjen e një grabitësi makinash në Kaliforni, pasi ai tentoi të vidhte një automjet policie dhe hapi zjarr ndaj forcave të rendit. Ngjarja ndodhi pas një ndjekjeje rreth 50 milje, që përfshiu disa qytete në jug të San Jose-s.
Sipas autoriteteve amerikane, i dyshuari ishte në kërkim për një seri vjedhjesh automjetesh. Ai fillimisht kishte vjedhur një makinë nga një sallon automjetesh në San Jose dhe më pas një tjetër në Hollister, duke tentuar të kthehej sërish drejt qytetit. Forcat e Sherifatit të San Benito County dhe policia lokale nisën ndjekjen me shpejtësi të lartë.
Incidenti përfundoi pranë autostradës Highway 87, ku i dyshuari braktisi automjetin dhe tentoi të marrë një makinë policie. Gjatë përplasjes, ai hapi zjarr, ndërsa policia reagoi menjëherë. Pas shkëmbimit të zjarrit, i dyshuari u neutralizua dhe humbi jetën në vendngjarje. Një rreshter i policisë së San Jose-s u plagos, por autoritetet konfirmuan se ai është jashtë rrezikut për jetën.
Pamjet ajrore treguan një prani të madhe të forcave të rendit dhe shërbimeve emergjente, ndërsa disa rrugë dhe segmenti i Highway 87 u mbyllën përkohësisht për siguri. Hetimet për rrethanat e sakta të incidentit janë në vijim.
Shoqata e Oficerëve të Policisë së San Jose-s vlerësoi veprimet e efektivëve, duke theksuar se i dyshuari kishte rrezikuar jetën e qindra qytetarëve gjatë ndjekjes dhe se ndërhyrja ishte e domosdoshme për të shmangur një rrezik serioz për publikun.
About the Author
