Perandoria e Daniel Kinahan në rënie: A po i vjen fundi bosit më të kërkuar të drogës në Evropë?

 I izoluar në Dubai dhe nën presion ndërkombëtar, Daniel Kinahan përballet me rrezikun real të ekstradimit ndërsa autoritetet thonë se rrjeti po mbyllet rreth tij

Daniel Kinahan, një nga figurat më famëkeqe të krimit të organizuar në botë, po jeton ditë gjithnjë e më të vështira në Dubai, aty ku për vite me radhë ka drejtuar një perandori kriminale me vlerë rreth një miliard paund. Sipas burimeve të sigurisë, shefi i kartelit irlandez është bërë gjithnjë e më i izoluar, i mbërthyer nga frika e arrestimit dhe i paaftë për t’i besuar rrethit përreth.

Karteli Kinahan, që në kulmin e fuqisë së tij kontrollonte deri në një të tretën e kokainës që hynte në Europë, ka pësuar goditje të rënda vitet e fundit. Hetimet intensive në Irlandë dhe Britani, si edhe sanksionet amerikane, kanë shkatërruar bazën e operacioneve të grupit në vendlindje, duke lënë pas dhjetëra anëtarë të arrestuar dhe struktura të çmontuara.

Familja Kinahan u zhvendos në Dubai në vitin 2016, pas një lufte të përgjakshme me klanin rival Hutch në Dublin, konflikt që la pas më shumë se një duzinë viktimash. Për vite me radhë, Emiratet u shndërruan në strehë të sigurt për bosët e krimit ndërkombëtar, falë tolerancës ndaj pastrimit të parave dhe mungesës së ekstradimeve. Por kjo situatë po ndryshon.

Autoritetet irlandeze kanë siguruar një marrëveshje ekstradimi me Dubain dhe kanë përgatitur dosje penale që synojnë ta çojnë Kinahanin para drejtësisë për drejtimin e një organizate kriminale dhe përfshirje në vrasje të rënda. Burime policore thonë se bashkëpunimi me autoritetet lokale në Emirate tashmë është real dhe efektiv.

Ndërkohë, perandoria e ndërtuar mbi trafik droge, armë dhe pastrim parash po tkurret. Mbi 80 persona të lidhur me kartelin janë dënuar ose arrestuar, ndërsa ndikimi i grupit në Irlandë dhe Britani është zbehur ndjeshëm. Edhe pse ende i pasur dhe me lidhje ndërkombëtare, Kinahan përshkruhet si një njeri nën presion të vazhdueshëm, i rrethuar nga frika dhe pasiguria.

Ekspertët e sigurisë besojnë se imazhi i kartelit si i paprekshëm i përket së shkuarës. Ajo që dikur ishte një superstrukturë kriminale globale, sot po përballet me izolim, hetime dhe rrezikun real të shembjes përfundimtare. Për Daniel Kinahanin, koha duket se nuk punon më në favorin e tij.