Era e fortë ka përshpejtuar përhapjen e zjarrit duke djegur shkurre dhe pemë, ndërsa zjarrfikësit po luftojnë për ta vënë situatën nën kontroll
Një zjarr i madh ka shpërthyer mbrëmjen e së dielës në zonën e Orikumit, pranë bazës së Pashalimanit, duke shkaktuar shqetësim tek banorët dhe autoritetet lokale. Sipas informacioneve paraprake, dyshohet se zjarri mund të jetë i qëllimshëm, ndërsa rrethanat e sakta mbeten ende të paqarta.
Flakët janë përhapur me shpejtësi për shkak të erës së fortë, duke përfshirë një sipërfaqe të gjerë me shkurre dhe pemë. Terreni i vështirë dhe kushtet atmosferike kanë komplikuar ndërhyrjen, duke e bërë situatën më problematike.
Në vendngjarje ndodhen forcat zjarrfikëse, të cilat po punojnë intensivisht për shuarjen e flakëve dhe për të parandaluar përhapjen e mëtejshme të zjarrit drejt zonave të tjera. Deri më tani nuk raportohet për dëme në banesa apo për persona të lënduar.
Autoritetet pritet të nisin verifikimet për të zbuluar shkaqet e rënies së zjarrit, ndërsa u bëhet thirrje qytetarëve të shmangin zonën dhe të njoftojnë menjëherë nëse konstatojnë raste të tjera zjarri apo veprime të dyshimta.
About the Author
