Nga Teksasi deri në New England, moti ekstrem ka paralizuar transportin, ka shkaktuar anulime masive fluturimesh dhe ka vënë në alarm autoritetet federale
Një stuhi dimërore me përmasa historike ka përfshirë Shtetet e Bashkuara, duke lënë më shumë se një milion konsumatorë pa energji elektrike dhe duke shkaktuar anulimin e mbi 10 mijë fluturimeve. Sipas të dhënave të PowerOutage.us, deri pasditen e së dielës mbi 1 milion familje dhe biznese mbetën pa rrymë, kryesisht në Tenesi, ndërsa situata kritike është shtrirë edhe në Misisipi, Teksas, Luiziana, Kentaki, Xhorxhia, Virxhinia dhe Alabama.
Shërbimi Kombëtar i Motit i National Weather Service paralajmëron se stuhia do të përshkojë dy të tretat lindore të vendit, duke sjellë reshje të dendura dëbore, shi të ngrirë dhe temperatura shumë nën zero. Kushtet e rrezikshme pritet të zgjasin për disa ditë, duke ndikuar rëndë në infrastrukturë dhe lëvizjen rrugore.
Reshje të mëdha dëbore janë parashikuar nga Lugina e Ohajos deri në verilindje të vendit, ndërsa akumulime të rrezikshme akulli kërcënojnë zonat nga Lugina e Misisipit të Poshtëm deri në Mes-Atlantik dhe Juglindje. Meteorologët theksojnë se rreth 213 milionë persona ndodhen nën paralajmërime të ndryshme për mot ekstrem.
Presidenti amerikan Donald Tramp e ka cilësuar stuhinë si historike dhe ka miratuar deklarata emergjence federale për afro 20 shtete dhe Distriktin e Kolumbias. Ai u ka bërë thirrje qytetarëve të qëndrojnë të sigurt dhe të përgatitur për kushte të ashpra dimërore.
Ndërkohë, të dhënat e FlightAware tregojnë se përveç anulimeve masive, mijëra fluturime të tjera janë vonuar, duke krijuar kaos në aeroportet amerikane. Autoritetet u kanë kërkuar pasagjerëve të shmangin udhëtimet e panevojshme dhe të ndjekin njoftimet e kompanive ajrore.
Agjencia Federale e Menaxhimit të Emergjencave, Federal Emergency Management Agency, ka dislokuar ekipe shpëtimi dhe furnizime në disa shtete, ndërsa Departamenti i Energjisë ka ndërmarrë masa emergjente për të garantuar stabilitetin e rrjetit elektrik në rajonet më të goditura.
Ekspertët shpjegojnë se kjo stuhi e pazakontë lidhet me një dobësim dhe shtrirje të vorbullës polare, një fenomen që po ndodh gjithnjë e më shpesh dhe që, sipas shkencëtarëve, mund të jetë i lidhur me ndryshimet klimatike. Autoritetet paralajmërojnë se temperaturat ekstremisht të ulëta pas stuhisë mund të zgjasin deri në një javë, duke përbërë rrezik serioz për shëndetin dhe jetën e qytetarëve.
About the Author
