Zonja e Parë e SHBA reagon publikisht, ndërsa tensionet dhe përplasjet me agjentët e emigracionit kanë shkaktuar viktima dhe ndarje të thella në shoqërinë amerikane
Zonja e Parë e Shteteve të Bashkuara, Melania Tramp, ka bërë një reagim të rrallë politik pas ngjarjeve të rënda që kanë tronditur Minnesotën, duke bërë thirrje për unitet dhe protesta paqësore mes javësh tensioni dhe përplasjesh të dhunshme.
Gjatë një interviste në emisionin Fox & Friends, Melania Tramp u shpreh qartë kundër dhunës, duke theksuar se e drejta për të protestuar nuk duhet të shoqërohet me akte agresive. Ajo u bëri thirrje qytetarëve që çdo formë kundërshtimi të zhvillohet në mënyrë paqësore, në një moment kur situata në shtetin amerikan mbetet e ndezur.
Reagimi i saj vjen në një kontekst të pazakontë, pasi Melania Tramp, me origjinë nga Sllovenia, njihet për distancën që mban nga deklaratat politike dhe çështjet e lidhura drejtpërdrejt me administratën e bashkëshortit të saj. Megjithatë, ajo konfirmoi gjithashtu se Presidenti Donald Tramp ka zhvilluar një bisedë që e cilësoi pozitive me guvernatorin e Minnesotës, Tim Walz, si dhe me kryetarin e bashkisë së Minneapolisit, Jacob Frey.
Sipas saj, autoritetet lokale dhe federale po bashkëpunojnë për të shmangur përshkallëzimin e dhunës dhe për të rikthyer qetësinë në qytet, pas përplasjeve të ashpra mes protestuesve dhe agjentëve të emigracionit.
Tensionet u rritën ndjeshëm pas vrasjes së Alex Pretti, një infermier në shërbimin e veteranëve, i cili u qëllua për vdekje nga agjentë të emigracionit gjatë një proteste kundër ICE. Pamjet filmike tregojnë se Pretti ishte çarmatosur përpara se të qëllohej disa herë, ndërsa ai humbi jetën në vendngjarje. Ngjarja pasoi një tjetër incident fatal, ku poetja Renee Good u vra nga një agjent i ICE gjatë një përplasjeje të ngjashme.
Të dyja rastet, të regjistruara në video, kanë ndezur debate të forta dhe kanë thelluar ndarjet në opinionin publik amerikan, veçanërisht lidhur me politikat e emigracionit dhe përdorimin e forcës nga autoritetet.
Deklarata e Melania Tramp shihet si një sinjal i qartë për seriozitetin e situatës dhe për klimën e tensionuar që po përjeton vendi, në një kohë kur thirrjet për qetësi dhe unitet duken më të nevojshme se kurrë.
About the Author
