Ngjarja e rëndë në North Codorus ka lënë tre oficerë të vdekur dhe dy të plagosur rëndë, ndërsa autoritetet kanë nisur një hetim të plotë dhe qytetarëve u kërkohet kujdes.

Një ngjarje e rëndë ka tronditur shtetin e Pensilvanisë, ku tre oficerë policie humbën jetën dhe dy të tjerë mbetën të plagosur gjatë një përplasjeje me armë zjarri, të mërkurën, në zonën rurale të North Codorus Township, afër kufirit me Maryland-in.

Guvernatori Josh Shapiro shprehu dhimbjen për humbjen e jetëve të shërbyesve të rendit: “Ne vajtojmë për tre shpirtra të çmuar që shërbyen këtë qark, këtë shtet dhe këtë vend. Dhuna e tillë është e papranueshme, si shoqëri duhet të bëjmë më mirë.”

Komisioneri i Policisë së Shtetit të Pensilvanisë, Christopher Paris, tha se hetimet do të jenë të plota dhe të drejta: “Dhimbja është e padurueshme, por ne do ta mbajmë. Nuk do të pushojmë derisa të kemi një hetim të plotë dhe të paanshëm për këtë ngjarje.”

Dy persona të plagosur janë dërguar në spitalin York, ku ndodhen në gjendje serioze. Institucioni ka vendosur masa të shtuara sigurie.

Prokurorja e Përgjithshme Pamela Bondi e cilësoi këtë akt si një plagë të shoqërisë, ndërsa autoritetet federale janë angazhuar në mbështetje të forcave vendase. Zëvendës guvernatori Austin Davis dhe Prokurori i Përgjithshëm Dave Sunday, kanë bërë thirrje për lutje dhe kujdes nga qytetarët, duke u kërkuar atyre të ndjekin udhëzimet e policisë.

Ngjarja çoi edhe në urdhrin e përkohshëm për një distrikt shkollor lokal, i cili u hoq më vonë, pasi u sigurua që nxënësit nuk ishin në rrezik.

Për momentin, policia nuk ka dhënë detaje mbi autorin apo autorët e përfshirë në sulm. Zona rurale ku ndodhi ngjarja është e rrethuar me forca të shumta policore, me rreth 30 mjete që bllokojnë rrugët përreth fermave dhe arave.

Kjo është ngjarja e dytë fatale për policinë, në këtë rajon, brenda këtij viti, pas rastit të shkurtit, kur një oficer humbi jetën në një shkëmbim zjarri në një spital lokal.