Një virus vdekjeprurës që shkakton ënjtje të trurit ka vënë autoritetet shëndetësore në gatishmëri të lartë, ndërsa rastet në Indi detyrojnë disa shtete të rikthejnë skanimet dhe karantinën e udhëtarëve
Aeroportet në disa vende të Azisë kanë rikthyer masat e kontrollit të stilit Covid, pas shpërthimit të virusit Nipah, një infeksion i rrezikshëm i cilësuar si një nga kandidatët kryesorë për pandeminë e ardhshme.
Të paktën pesë raste janë konfirmuar në shtetin indian West Bengal, ku të infektuarit janë punonjës shëndetësorë të lidhur me një spital privat. Dy infermiere ndodhen në gjendje kritike, të shtruar në terapi intensive dhe në koma, ndërsa rreth 110 persona që kanë qenë në kontakt me ta janë futur në karantinë.
Si masë parandaluese, Tajlanda ka nisur kontrolle të shtuara për pasagjerët që vijnë nga India në tre aeroporte kryesore, Suvarnabhumi, Don Mueang dhe Phuket. Udhëtarët me temperaturë të lartë apo simptoma të dyshimta transferohen menjëherë në ambiente karantine. Edhe Nepali ka rritur nivelin e alarmit, duke forcuar kontrollet në aeroportin ndërkombëtar të Katmandusë dhe në pikat kufitare me Indinë.
Virusi Nipah transmetohet kryesisht nga kafshët te njerëzit, veçanërisht nga lakuriqët e natës frutngrënës dhe derrat, por mund të përhapet edhe nga njeriu te njeriu përmes kontaktit të ngushtë. Infeksioni mund të shkaktojë probleme të rënda respiratore dhe ënjtje fatale të trurit, me një shkallë vdekshmërie që arrin deri në 75 për qind. Aktualisht nuk ekziston as vaksinë dhe as trajtim specifik, ndërsa mjekët fokusohen vetëm në mbajtjen në jetë të pacientëve.
World Health Organization e ka klasifikuar Nipah si një patogjen prioritar për shkak të potencialit të tij pandemik. Edhe agjencitë shëndetësore britanike e kanë përfshirë virusin në listën e kërcënimeve kryesore për shëndetin publik në të ardhmen.
Ekspertët theksojnë se, ndonëse përhapja nga njeriu te njeriu nuk është shumë efikase aktualisht, ndryshimet klimatike dhe afrimi i kafshëve të egra me zonat e banuara nga njerëzit rrisin rrezikun e shpërthimeve të reja. Simptomat fillestare janë të lehta, si temperaturë, dhimbje koke dhe të vjella, çka e bën virusin të vështirë për t’u identifikuar në fazat e para.
Autoritetet ndërkombëtare shëndetësore po monitorojnë nga afër situatën, ndërsa rikthimi i masave të forta në aeroporte shihet si një sinjal serioz se frika nga një pandemi e re nuk është më thjesht teori, por një rrezik real që kërkon gatishmëri maksimale.
About the Author
