Dy shtetas nga Tirana dhe Kukësi u kapën në flagrancë teksa transportonin emigrantë të paligjshëm nga vendet e treta drejt Bashkimit Europian, përmes Kosovës
Dy persona janë arrestuar nga policia, pasi akuzohen se po trafikonin emigrantë të paligjshëm drejt vendeve të Bashkimit Europian, kundrejt pagesës. Operacioni policor i koduar “Relay 4” u zhvillua në aksin kombëtar Tiranë–Durrës, pas disa javësh hetime me metoda speciale.
Në pranga ranë Arlen Coku, 38 vjeç, banues në Tiranë, dhe Endrit Tota, 35 vjeç, banues në Kukës. Sipas policisë, dy të arrestuarit bashkëpunonin për transportimin e klandestinëve nga vendet e treta drejt Shqipërisë dhe më pas drejt BE-së.
Gjatë kontrollit në rrugën Tiranë–Durrës, u ndalua automjeti që drejtohej nga 38-vjeçari, ku udhëtonin edhe katër emigrantë të paligjshëm. Destinacioni i parë ishte Kukësi dhe më pas, përmes territorit të Kosovës, kalimi ilegal drejt vendeve të Bashkimit Europian do të realizohej me ndihmën e bashkëpunëtorit tjetër.
Policia sekuestroi automjetin me të cilin kryhej transporti, si edhe dy telefona celularë që dyshohet se përdoreshin për organizimin e aktivitetit kriminal. Specialistët e Seksionit për Hetimin e Trafiqeve të Paligjshme bënë me dije se operacioni u finalizua me sukses falë bashkëpunimit me prokurorinë.
Autoritetet konfirmojnë se hetimet vijojnë për identifikimin e personave të tjerë të përfshirë në këtë rrjet trafikimi. Materialet procedurale i janë referuar Prokuroria e Tiranës për veprime të mëtejshme ligjore.
About the Author
