Presidenti amerikan paralajmëron Teheranin se koha po mbaron dhe se një sulm i ri do të ishte shumë më i ashpër nëse nuk arrihet një marrëveshje pa armë bërthamore
Presidenti i SHBA-së, Donald Tramp, ka rikthyer retorikën e fortë ndaj Iranit, duke paralajmëruar se Shtetet e Bashkuara janë të gatshme të ndërmarrin veprime ushtarake nëse Teherani nuk pranon të negociojë për programin e tij bërthamor.
Në një postim të gjatë në platformën Truth Social, Tramp deklaroi se një flotë e madhe ushtarake amerikane është në lëvizje drejt Iranit, duke theksuar se operacioni po zhvillohet me shpejtësi dhe vendosmëri. Ai u shpreh se shpreson që Irani të ulet sa më shpejt në tryezën e negociatave për një marrëveshje të drejtë dhe të balancuar, e cila përjashton plotësisht armët bërthamore.
Presidenti amerikan paralajmëroi se nëse Irani nuk pranon marrëveshjen, pasojat do të jenë shumë më të rënda se më parë, duke iu referuar në mënyrë të tërthortë bombardimeve amerikane ndaj objekteve bërthamore iraniane të kryera në qershor. Sipas tij, koha është thelbësore dhe durimi i SHBA-së po shkon drejt fundit.
Reagimi i Tramp vjen vetëm pak orë pasi ministri i Jashtëm i Iranit, Abbas Araghchi, deklaroi se Teherani nuk do të rifillojë negociatat nën kërcënimin e një sulmi ushtarak. Kjo deklaratë ka thelluar më tej tensionet mes dy vendeve, duke rritur shqetësimet për një përshkallëzim të ri në Lindjen e Mesme.
Situata mbetet e tensionuar dhe pritet të ndiqet me vëmendje nga komuniteti ndërkombëtar, ndërsa rreziku i një përplasjeje të drejtpërdrejtë mes SHBA-së dhe Iranit duket më i lartë se kurrë.
About the Author
