Federata Europiane e Gazetarëve kritikon ndryshimet në Kodin Penal, duke kërkuar heqjen e plotë të shpifjes për të gjithë qytetarët dhe jo vetëm për gazetarët
Kuvendi i Shqipërisë ka miratuar pas një seance rreth 18-orëshe ndryshimet në Kodin Penal me 85 vota pro, duke përfshirë edhe dekriminalizimin e shpifjes, por vetëm për gazetarët. Mazhoranca socialiste refuzoi propozimin e opozitës për heqjen e kësaj vepre penale për të gjithë qytetarët, duke lënë në fuqi ndëshkimin penal për pjesën tjetër të shoqërisë.
Qeveria e paraqiti këtë ndryshim si të harmonizuar me udhëzimet e Bashkimi Europian në kuadër të procesit të integrimit, por kjo qasje është kundërshtuar nga organizatat europiane të medias. Pak para votimit, Federata Europiane e Gazetarëve reagoi publikisht, duke e cilësuar dekriminalizimin e pjesshëm si të pamjaftueshëm dhe në kundërshtim me standardet europiane.
Sipas këtyre organizatave, standardet e BE-së kërkojnë heqjen e plotë të shpifjes nga Kodi Penal dhe jo trajtime selektive të bazuara në status profesional. Dekriminalizimi vetëm për gazetarët, theksohet në reagim, krijon një precedent problematik, pasi lë të hapur mundësinë e presionit penal ndaj qytetarëve të tjerë dhe cenon lirinë e shprehjes në tërësi.
Organizatat e medias mirëpresin forcimin e mbrojtjes penale kundër dhunës dhe kërcënimeve ndaj gazetarëve për shkak të ushtrimit të profesionit, veçanërisht përmes ndryshimeve në nenet 237 dhe 238 të Kodit Penal, të cilat adresojnë shqetësime të hershme mbi sigurinë e gazetarëve dhe detyrimet e shtetit sipas ligjit europian të të drejtave të njeriut.
Megjithatë, ato theksojnë se qasjet e pjesshme ose të bazuara në status për dekriminalizimin e shpifjes nuk janë të mjaftueshme për të garantuar mbrojtje efektive të lirisë së shprehjes. Për sa kohë shpifja mbetet vepër penale, ajo vazhdon të ketë efekt frikësues jo vetëm për gazetarët, por edhe për aktorët e shoqërisë civile, aktivistët, denoncuesit dhe qytetarët që monitorojnë interesin publik.
Një tjetër shqetësim i ngritur lidhet me faktin se ofendimi mbetet ende vepër penale, çka sipas organizatave dobëson efektivitetin e reformës dhe lejon ndjekjen penale të shprehjes kritike përmes dispozitave alternative. Po ashtu, referencat për gazetarë të regjistruar dhe të njohur konsiderohen problematike, pasi Shqipëria nuk ka një sistem formal regjistrimi për gazetarët dhe mekanizma të tillë bien ndesh me standardet europiane për lirinë dhe pavarësinë e medias.
Në këtë kontekst, organizatat europiane theksojnë se dekriminalizimi i plotë i shpifjes dhe ofendimit mbetet i vetmi hap i pranueshëm për të garantuar përputhje të qëndrueshme me standardet europiane dhe për të mbrojtur lirinë e shprehjes dhe interesin publik në Shqipëri.
About the Author
