Trump rikthen sulmet ndaj Antifa-s. Ekspertët paralajmërojnë se mungon baza ligjore për ta shpallur lëvizjen terroriste.

Presidenti amerikan Donald Trump ka njoftuar planet për të shpallur lëvizjen e majtë Antifa si një organizatë terroriste, duke e përshkruar atë si një katastrofë të rrezikshme radikale të së majtës dhe një organizim terrorist madhor.

Në një postim në platformën e tij Truth Social, Trump paralajmëroi gjithashtu se financuesit e Antifa-s do të hetohen me standardet më të larta ligjore. Njoftimi vjen pak ditë pasi zyrtarë të Shtëpisë së Bardhë deklaruan se administrata do të shpërbëjë një lëvizje të gjerë terroriste të brendshme që sipas tyre lidhet me atentatin ndaj komentatorit të djathtë Charlie Kirk.

Megjithatë, ekspertët ligjorë theksojnë se nuk ka mekanizëm ligjor në SHBA për të shpallur një organizatë të brendshme si terroriste, duke ngritur shqetësime mbi shkeljen e Amendamentit të Parë për lirinë e fjalës. Antifa, shkurtim i anti-fashistë, nuk ka strukturë të qartë, lidership apo anëtarësi të përcaktuar, çka e bën shpalljen edhe më të diskutueshme.

Kritikët e akuzojnë Trump-in se po përdor vrasjen e Kirk si pretekst për të goditur kundërshtarët politikë, ndërsa senatorë republikanë kanë mbështetur hapin duke e quajtur Antifa një faktor nxitës të dhunës dhe anarkisë. Kjo nuk është hera e parë që Trump përpiqet të bëjë një shpallje të tillë, në vitin 2020 ai kishte kërcënuar me një masë të ngjashme, pas protestave të mëdha për vrasjen e George Floyd, por pa sukses për shkak të pengesave ligjore.