Familja e 17-vjeçares nga Skocia kërkon ndryshim ligji, duke thënë se vajza e tyre do të ishte diagnostikuar më herët nëse do të trajtohej si një paciente e rritur
Historia e Isla Sneddon ka tronditur opinionin publik në Skoci dhe më gjerë. Vajza nga qyteti Airdrie ndërroi jetë në moshën 17-vjeçare, dy vite pasi kishte kërkuar ndihmë mjekësore për dhimbje në kraharor dhe një kokërr në gji, shqetësime që sipas familjes së saj u minimizuan dhe u cilësuan si ankth për shkak të moshës së re.
Isla ishte vetëm 15 vjeçe kur, në korrik të vitit 2022, u paraqit për herë të parë tek mjekët. Prindërit e saj tregojnë se u siguruan se bëhej fjalë për ndryshime hormonale të zakonshme dhe se nuk kishte arsye për shqetësim serioz. Edhe më vonë, kur simptomat vazhduan, rasti i saj u trajtua pa urgjencën që zakonisht zbatohet për pacientët e rritur.
Vetëm në vitin 2024, kur gjendja e saj u përkeqësua ndjeshëm, Isla u diagnostikua me kancer. Në atë moment, sëmundja kishte avancuar dhe ishte përhapur në disa organe jetike, duke e bërë trajtimin të pamundur. Ajo jetoi vetëm edhe pak muaj pas diagnozës.
Prindërit e saj, Mark dhe Michelle Sneddon, thonë se nuk pretendojnë se vajza e tyre do të ishte shpëtuar domosdoshmërisht , por besojnë se një reagim më i shpejtë do t’u kishte dhënë më shumë kohë. Ata kanë nisur një peticion publik, të quajtur Isla’s Law, duke kërkuar që fëmijët dhe adoleshentët me dyshime për kancer të trajtohen me të njëjtën urgjencë dhe afate maksimale si të rriturit.
Nisma ka mbledhur dhjetëra mijëra nënshkrime dhe pritet të diskutohet nga qeveria skoceze. Sekretari i Shëndetësisë, Neil Gray, pritet të takohet me familjen për të shqyrtuar kërkesat e tyre.
Sot, prindërit e Islas thonë se lufta e tyre ka një qëllim të vetëm: që asnjë familje tjetër të mos përjetojë të njëjtën humbje për shkak të vonesave, paragjykimeve apo nënvlerësimit të simptomave te fëmijët.
About the Author
