Apeli rrëzon versionin e saj dhe e shpall fajtore për vrasje me dashje, pasi i dha një foshnje 11-muajshe një substancë acide vdekjeprurëse
Gjykata e Apelit në Francë ka dënuar me 30 vite burg ish-punonjësen e një çerdheje në Lyon, e shpallur fajtore për vrasjen e një foshnje 11 muajshe në qershor të vitit 2022. Vendimi u dha pas një procesi të rëndë tre-ditor në Gjykatën e Krimeve të departamentit Ain, e cila vlerësoi se e pandehura kishte vepruar me qëllim për t’i marrë jetën fëmijës.
Myriam Jaouen, 27 vjeçe në kohën e ngjarjes, akuzohet se i ka futur në gojë foshnjës Lisa një sasi masive zhbllokuesi tubacionesh me bazë acidi. Fëmija ndërroi jetë pas disa orësh, pavarësisht përpjekjeve për ta shpëtuar.
Dënimi prej 30 vitesh burg shoqërohet automatikisht me një periudhë sigurie 15-vjeçare, gjatë së cilës ajo nuk mund të përfitojë lirim të parakohshëm. Jaouen ka afat dhjetë ditë për t’iu drejtuar Gjykatës së Kasacionit.
Në shkallën e parë, juria e kishte dënuar me 25 vite burg, pa pranuar se kishte pasur qëllim vrasjeje. Por në apel, gjykata vlerësoi se ajo kishte vepruar me vetëdije, duke përdorur një produkt toksik dhe vdekjeprurës, të administruar drejtpërdrejt në gojën e një foshnjeje.
E pandehura ka pranuar se i ka dhënë substancën acide fëmijës, por ka këmbëngulur se qëllimi i saj ishte ta bënte të ndalonte së qari dhe jo ta vriste. Ky version u rrëzua nga hetues, mjekë dhe ekspertë psikiatrikë, të cilët dëshmuan se rrezikshmëria e produktit ishte e njohur dhe e qartë.
Ekspertët e përshkruan Jaouen si të papjekur dhe me mangësi të moderuara intelektuale, por pa asnjë sëmundje mendore që të justifikonte mungesën e përgjegjësisë penale. Gjykata përjashtoi çdo mundësi për heqje apo ulje të përgjegjësisë për shkak të gjendjes mendore.
Procesi nxori në pah edhe përpjekjet e saj për të mashtruar pas ngjarjes. Sipas dosjes, ajo kishte ndërtuar një histori të rreme për të justifikuar gjendjen e foshnjës, duke pretenduar se boja ishte derdhur aksidentalisht në gojën e saj, madje kishte njollosur edhe rrobat për ta bërë versionin më të besueshëm.
Prindërit e vogëlushes Lisa, të pranishëm gjatë gjithë procesit, e pritën vendimin përfundimtar në heshtje dhe qetësi. Për drejtësinë franceze, ky vendim përbën një mesazh të fortë se vrasjet e fëmijëve, veçanërisht në ambiente kujdesi, do të ndëshkohen me ashpërsinë maksimale të ligjit.
About the Author
