Një koleksion prej 229 hartash të rralla të André Thevet, shumë prej tyre të panjohura më parë, del në ankand në Paris më 24 shtator, duke rizgjuar interesin për tregun e kartografisë antike.

Një përmbledhje e rrallë e gravurave të kozmografit André Thevet (1516-1592), e quajtur Grand Insulaire, do të shitet më 24 shtator në ankandin e shtëpisë pariziane Millon, me një çmim fillestar prej 10 mijë eurosh.

Shtëpia e ankandeve Millon ka krijuar një kategori të re të quajtur “Les Inestimables” për të nënvizuar rëndësinë e këtij koleksioni, që përmban 229 harta, gati gjysma e të cilave nuk ishin bërë kurrë të njohura më parë. Sipas ekspertes së librave të vjetër, Elvire Poulain Marquis, çmimi pritet të rritet ndjeshëm, pasi edhe karta të vetme të ngjashme janë shitur deri në 2 mijë euro secila.

“Grand Insulaire” përfaqëson një projekt editorial gjigant që nuk u botua kurrë plotësisht. Hartat, të shoqëruara me tekste shpjeguese të ruajtura sot në Bibliotekën Kombëtare të Francës, nuk janë thjesht ilustrime, por kapituj më vete që shpjegojnë çdo pjesë të botës së asaj kohe. Vlerësohet se ekzistojnë vetëm katër ose pesë seri të tilla të provave tipografike.

Ky ankand i jep koleksionistëve dhe pasionantëve të historisë së gjeografisë një mundësi të rrallë për të rizbuluar thesaret kartografike të shekullit XVI.