Autoritetet tajlandeze thonë se 30-vjeçari rus dyshohet se u vra nga një grup personash, ndërsa dy bashkëkombës janë arrestuar
Autoritetet në Tajlandë kanë konfirmuar se mbetjet mortore të një turisti të zhdukur prej rreth tre javësh janë gjetur në një varr të cekët pranë qytetit turistik të njohur për jetën e natës, Pattaya. Viktima është identifikuar si Mikhail Emelianov, 30 vjeç, shtetas rus.
Zbulimi u bë më 1 shkurt, pasi policia u njoftua nga një banor lokal. Sipas autoriteteve, mbetjet ishin varrosur në disa pika të një zone të braktisur dhe po i nënshtrohen ende verifikimeve përfundimtare, megjithëse policia thotë se ka bindje të fortë për identitetin, bazuar në veshje dhe shenja dalluese.
Drejtori i policisë rajonale deklaroi se ekzaminimet paraprake sugjerojnë se vdekja ka ndodhur të paktën dhjetë ditë më parë dhe se plagët janë në përputhje me dhunë fizike. Hetuesit dyshojnë se motivi lidhet me një borxh rreth 120 mijë dollarë, i dyshuar i lidhur me aktivitet kriminal.
Sipas familjes, Emelianov u zhduk në fillim të janarit, pasi kishte takuar dy persona të tjerë rusë në Pattaya. Gjatë ditës së zhdukjes, ai kishte ndarë vazhdimisht vendndodhjen me nënën e tij dhe i kishte dërguar një mesazh të fundit mbrëmjen e asaj dite.
Policia njoftoi se dy shtetas rusë, Iaroslav Demidov, 34 vjeç, dhe Dmitrii Makalev, 37 vjeç, janë arrestuar dhe mbahen në paraburgim. Ata akuzohen për vrasje me dashje, fshehje të trupit dhe ndalim me dhunë që ka çuar në vdekjen e viktimës.
Pattaya, e njohur zyrtarisht si destinacion turistik, ka fituar prej vitesh nofkën “Sin City” për shkak të krimit dhe trafikut të drogës, duke u shndërruar edhe në një strehë për të huaj që kërkojnë të shmangin probleme ligjore në vendet e tyre. Hetimet vijojnë, ndërsa autoritetet thonë se do të sqarojnë plotësisht rrethanat e kësaj ngjarjeje të rëndë.
About the Author
