Një i ri nga Hamiltoni është dënuar me një vit burg në Shtetet e Bashkuara, pasi pranoi fajësinë për një seri vjedhjesh kriptomonedhash në vitin 2022, ku u prekën rreth 200 persona dhe u përfituan mbi 1 milion dollarë kanadezë.

Por ky nuk ishte krimi i tij i parë. Në vitin 2020, kur ishte vetëm 17 vjeç, ai arriti të grabiste 48 milionë dollarë në kriptomonedha nga sipërmarrësi amerikan Josh Jones – një ndër vjedhjet më të mëdha në historinë e Kanadasë.

Përmes teknikës “SIM swap”, ai mori kontrollin e mesazheve dhe kodeve të sigurisë të viktimës, duke hyrë në llogaritë e tij dhe duke transferuar paratë. Hetuesit zbuluan lidhjen me krimin pasi ai përdori një pjesë të fondeve për të blerë emrin e rrallë “God” në PlayStation, i cili u gjurmua nga autoritetet.

Prokurorët amerikanë e quajtën “mashtrues serial” të botës virtuale, ndërsa mbrojtja e përshkroi si një adoleshent të brishtë që kërkonte pranim dhe vlerësim në internet.