Presidenti francez Emmanuel Macron dhe bashkëshortja e tij, Brigitte Macron, kanë ndërmarrë një betejë ligjore në Shtetet e Bashkuara, duke paditur për shpifje pas akuzave të përhapura se zonja e parë e Francës ka lindur mashkull dhe më vonë ka kaluar në femër.

Në qendër të procesit gjyqësor është influencerja amerikane Candace Owens, e cila publikisht ka përhapur pretendime të pavërteta rreth Brigitte Macron. Përmes avokatit të tyre, Tom Clare, çifti presidencial ka njoftuar se në gjykatë do të dorëzohen prova shkencore dhe fotografike, për të dëshmuar pa asnjë dyshim se Brigitte Macron ka lindur grua.

“Ky sulm i pabazë është bërë një shpërqendrim i madh dhe ka sjellë dhimbje të konsiderueshme për zonjën Macron dhe familjen e saj,” deklaroi Clare, duke nënvizuar se padia synon të ndalë përhapjen e lajmeve të rreme dhe të mbrojë integritetin e çiftit presidencial.

Nuk është hera e parë që Brigitte Macron përballet me akuza të tilla. Në vitin 2024, ajo fitoi një çështje shpifjeje në Francë kundër dy blogereve që kishin përhapur të njëjtën teori konspirative. Megjithatë, vendimi u rrëzua në apel një vit më vonë, jo për shkak të vërtetësisë së pretendimeve, por për arsye procedurale dhe të lirisë së shprehjes.

Procesi aktual në SHBA shihet si një test i rëndësishëm për kufirin mes lirisë së shprehjes dhe mbrojtjes së reputacionit në epokën e mediave sociale, ku shpifjet shpesh marrin shtrirje globale brenda pak minutash.