Një skaf me emigrantë u përplas pranë ishullit të Chios, ndërsa operacioni i kërkim-shpëtimit vijon për persona të zhdukur
Një ngjarje e rëndë është regjistruar në Detin Egje, ku të paktën 15 persona kanë humbur jetën pasi një skaf që transportonte emigrantë u përplas me një anije të rojës bregdetare greke. Aksidenti ndodhi në ujërat pranë ishullit Chios dhe shkaktoi një operacion të gjerë kërkim-shpëtimi nga autoritetet.
Sipas të dhënave zyrtare, nga deti janë nxjerrë 14 trupa, ndërsa një grua që i mbijetoi fillimisht përplasjes ndërroi jetë më vonë në spital, duke e çuar bilancin e viktimave në 15. Mes viktimave raportohet se ka edhe gra, ndërsa autoritetet nuk kanë ende një shifër të saktë për numrin total të personave që ndodheshin në skaf.
Shërbimet e emergjencës arritën të shpëtojnë 25 persona, përfshirë 11 fëmijë, të cilët u transportuan me urgjencë drejt spitalit në Chios. Disa prej të plagosurve kanë pasur nevojë për ndërhyrje kirurgjikale, ndërsa gjendja e tyre shëndetësore po monitorohet.
Në operacion u përfshinë anije patrullimi me zhytës, si dhe një helikopter i forcave ajrore greke. Dy punonjës të rojës bregdetare mbetën të plagosur gjatë përplasjes. Autoritetet greke bëjnë me dije se rrethanat e sakta të aksidentit janë ende nën hetim.
Sipas mediave shtetërore, anija patrulluese kishte dhënë sinjal paralajmërues pasi kishte identifikuar skafin me emigrantë, por mjeti dyshohet se tentoi të largohej me shpejtësi, çka çoi në përplasjen fatale.
Deti Mesdhe dhe Egjeu vijojnë të mbeten ndër rrugët më të rrezikshme të migrimit drejt Evropës. Sipas të dhënave ndërkombëtare, mijëra emigrantë kanë humbur jetën ose janë zhdukur gjatë përpjekjeve për të arritur brigjet evropiane në vitet e fundit, duke e kthyer migrimin detar në një nga krizat më të rënda humanitare të dekadës.
About the Author
