Presidenti amerikan e cilëson kryeministrin hungarez si lider të fortë dhe nacionalist, ndërsa sondazhet tregojnë rënie të mbështetjes për Fidesz dhe rritje të opozitës
Presidenti i Shteteve të Bashkuara Donald Tramp ka shprehur publikisht mbështetjen e tij për kryeministrin hungarez Viktor Orban përpara zgjedhjeve parlamentare që do të mbahen më 12 prill në Hungari. Përmes një postimi në platformën Truth Social, Tramp e përshkroi Orbanin si një lider vërtet të fortë dhe të fuqishëm, duke theksuar afërsinë ideologjike mes tyre.
Tramp deklaroi se Orban lufton pa u lodhur për vendin dhe popullin e tij, duke e krahasuar qasjen e tij nacionaliste dhe politikat e forta kundër emigracionit me ato që ai vetë ka ndjekur në Shtetet e Bashkuara. Ai shtoi se marrëdhëniet mes Hungarisë dhe SHBA-së kanë arritur nivele të reja bashkëpunimi gjatë administratës së tij, falë, sipas tij, rolit të Orbanit.
Kjo mbështetje vjen në një moment delikat për kryeministrin hungarez, i cili përballet me rënie të ndjeshme të popullaritetit. Një sondazh i publikuar më 3 shkurt nga kompania kërkimore 21 Kutatokozpon tregon se partia opozitare Tisza kryeson me 35% të mbështetjes, kundrejt 28 % të aleancës qeverisëse Fidesz.
Analistët e lidhin këtë rënie me situatën ekonomike dhe pakënaqësinë në rritje ndaj politikave të ashpra të Orbanit, të cilat janë kritikuar vazhdimisht nga organizatat për të drejtat e njeriut si shenja të prapakthimit demokratik dhe përqendrimit të pushtetit. Kufizimet ndaj azilkërkuesve dhe presioni ndaj kritikëve të qeverisë kanë shkaktuar reagime të forta brenda dhe jashtë vendit.
Megjithatë, Orban mbetet një aleat i afërt i Trampit dhe pjesë e një rrjeti liderësh të djathtë që presidenti amerikan ka mbështetur hapur në zgjedhje të ndryshme ndërkombëtare. Më herët, Tramp ka ndërhyrë në mënyrë të drejtpërdrejtë edhe në gara elektorale në Amerikën Latine dhe Evropë, duke kushtëzuar ndihmën ekonomike ose duke dhënë mbështetje politike për kandidatë të caktuar.
About the Author
