Mbi 50 civilë u vranë në komunën Cabaret, ndërsa dhjetëra shtëpi u dogjën nga koalicioni kriminal “Viv ansanm”. OKB dhe autoritetet vendase dënojnë sulmin.
Një organizatë vendase për të drejtat e njeriut raportoi se më 11 dhe 12 shtator 2025, në fshatin Laboderie të komunës Cabaret, rreth 25 kilometra në veri të Port-au-Prince, koalicioni i bandave “Viv ansanm” kreu një sulm të përshkruar si të një mizorie ekstreme. Sipas raportit, të paktën 50 persona u ekzekutuan dhe dhjetëra banesa u dogjën.
Disa trupa ende nuk janë gjetur, ndërsa disa të tjerë u lanë nëpër shkurre dhe u shqyen nga qentë, denoncoi OJQ-ja RNDDH. Banorët që i shpëtuan sulmit janë strehuar në fshatra fqinje ose kanë marrë detin me varka për t’u larguar nga dhuna.
Që prej pranverës së vitit 2024, Cabaret kontrollohet nga “Viv ansanm”, bandë që akuzon popullsinë lokale për bashkëpunim me policinë. Pas dorëheqjes së kryeministrit Ariel Henry në prill 2024, vendi qeveriset nga një Këshill presidencial tranzicioni, i cili e cilësoi këtë masakër si akte barbare dhe shprehu indinjatë të thellë.
Sekretari i Përgjithshëm i OKB-së, Antonio Guterres, dënoi në rrjetet sociale këtë sulm brutal dhe bëri thirrje për forcimin e Misionit Shumëkombësh të Sigurisë (MMAS), i udhëhequr nga Kenia, që ndihmon policinë haitiane të pajisur dobët dhe të tejlodhur përballë bandave që sot kontrollojnë rreth 90% të kryeqytetit.
