Teherani pezullon bashkëpunimin me Agjencinë Ndërkombëtare për Energjinë Atomike (IAEA); marrëveshja e inspektimeve në rrezik, Pezeshkian sfidon sanksionet.
Irani njoftoi se do të pezullojë bashkëpunimin me IAEA, pasi Këshilli i Sigurimit i OKB-së dështoi të miratojë një rezolutë për të mbajtur të ngritura lehtësimet e sanksioneve, duke hapur rrugën për rikthimin e tyre (“snapback”). Njoftimi erdhi nga Këshilli i Lartë i Sigurisë Kombëtare (SNSC), i kryesuar nga presidenti Masoud Pezeshkian.
Votimi i së premtes në KS të OKB-së nuk arriti të ndalonte mekanizmin e “snapback”-ut, ndërsa Londra, Parisi dhe Berlini e kanë vënë në lëvizje procesin 30-ditor për rikthimin e sanksioneve ndaj Teheranit.
Mekanizmi u aktivizua më 28 gusht, pas akuzave se Irani ka shkelur marrëveshjen bërthamore të vitit 2015 (JCPOA); sanksionet, përfshirë embargon e armëve, kufizimet për pasurimin e uraniumit dhe aktivitetet me raketa balistike, si edhe ngrirjen e aseteve dhe ndalimet e udhëtimit, mund të rikthehen brenda ditëve në vijim, nëse nuk arrihet kompromis.
IAEA ka raportuar këtë vit se Irani zotëron mbi 400 kg uranium të pasuruar deri në 60%, një nivel nën pragun e armëve, por shumë i lartë për përdorim civil.
Teherani paralajmëron se marrëveshja e re teknike me IAEA për rihapjen e inspektimeve, e arritur këtë muaj në Kajro do të anulohet nëse rivendosen sanksionet.
Ndërkohë, Presidenti Masoud Pezeshkian deklaroi se Irani do të kapërcejë çdo pengesë nëse sanksionet rikthehen, duke e cilësuar presionin perëndimor si kërkesë të tepruar dhe duke theksuar se sulmet ndaj objekteve bërthamore si Natanz e Fordow, nuk do ta ndalin programin civil.
About the Author
