Rojet ajrore me reagim të shpejtë, të NATO-s, (QRA) urdhëruan ngritjen ndaj një IL-20M, pa plan fluturimi e pa radio; pas identifikimit, eskortimi i kalon partnerëve suedezë.
Forcat Ajrore Gjermane deklaruan se dy Eurofighter u ngritën të dielën si pjesë e “Quick Reaction Alert” (QRA) për të kontrolluar një mjet ajror që fluturonte në hapësirë neutrale mbi Detin Baltik, pa plan fluturimi dhe pa komunikim në radio. Pas identifikimit vizual, objekti rezultoi një IL-20M (avion zbulues/rikonjicimi, emri i raportimit të NATO-s “Coot-A”). Eskortimi iu dorëzua partnerëve suedezë dhe avionët gjermanë u kthyen në bazën në “Rostock Laage”.
Incidenti vjen ndërsa Këshilli i Atlantikut të Veriut pritet të mblidhet të martën, për një çështje të veçuar: Estonia raportoi shkelje të paprecedentë të hapësirës së saj ajrore nga tre MiG-31 rusë që qëndruan 12 minuta pa leje. Tallinn kërkoi konsultime sipas Nenit 4 të NATO-s; Moska e ka mohuar akuzën, ndërsa ambasadori rus u thirr në Ministrinë e Jashtme estoneze.
Gjatë javëve të fundit janë shënuar edhe episode të tjera përgjatë krahut lindor: Rumania njoftoi për zbulim dronësh rusë në radar, duke ngritur avionë luftarakë, ndërsa Polonia raportoi rrëzime dronësh gjatë një vale goditjesh ruse mbi Ukrainë. Analistët ushtarakë thonë se këto fluturime në zona kufitare shërbejnë si test i kohës së reagimit, mbledhje informacioni dhe presion psikologjik ndaj anëtarëve të NATO-s.
Në Baltik, patrullimi ajror mbetet në funksion të përhershëm: misionet e QRA-së ngrihen brenda minutash për të verifikuar avionë pa transponder, pa radio ose jashtë itinerarit, me rregullin që pas identifikimit eskortimi i kalon aleatit më të afërt ose vendit pritës. Autoritetet gjermane deklaruan se ndërhyrja përfundoi pa incidente dhe se trafiku ajror civil nuk u ndikua.
About the Author
