Franca dhe Arabia Saudite po përgatiten të organizojnë një samit njëditor në Kombet e Bashkuara, një ditë përpara fillimit të Asamblesë së Përgjithshme, i cili do të fokusohet tek lufta e Izraelit në Gaza dhe tek zgjidhja e shumëkërkuar me dy shtete.
Në selinë e OKB-së në New York, liderë botërorë do të mblidhen të hënën për të ringjallur idenë e ngecur prej dekadash, mes paralajmërimeve se një shtet palestinez i pandërprerë mund të zhduket krejtësisht si pasojë e veprimeve hegjemonike të Izraelit në Gaza dhe Bregun Perëndimor të pushtuar.
Franca pritet të shpallë njohjen zyrtare të Palestinës, ndërsa Belgjika po e shqyrton një vendim të ngjashëm. Kjo do të ndodhë vetëm një ditë pasi Mbretëria e Bashkuar, Kanadaja, Australia dhe Portugalia njohën shtetin palestinez, një zhvillim historik, pavarësisht kundërshtimit të fortë të Izraelit dhe Shteteve të Bashkuara.
Izraeli dhe aleatët e tij kryesorë po e bojkotojnë samitin, me ambasadorin e Izraelit në OKB, Danny Danon, i cili e përshkroi ngjarjen si një cirk dhe përsëriti akuzat se këto lëvizje shpërblejnë terrorizmin.
Kryeministri Benjamin Netanyahu ndodhet nën presion të madh politik të brendshëm, teksa njohjet për shtetin palestinez po shtohen. Sipas mediave izraelite, qeveria e tij e ekstremit të djathtë po shqyrton aneksimin e pjesshëm ose të plotë të Bregut Perëndimor, por Netanyahu kërkon mbështetje dhe mbulim diplomatik nga SHBA, të cilën do ta synojë gjatë vizitës në New York për Asamblenë e Përgjithshme.
Samiti pritet të ndërtohet mbi Deklaratën e Nju Jorkut, të miratuar më herët këtë muaj nga Asambleja e Përgjithshme, pas një konference të përbashkët të Francës dhe Arabisë Saudite. Dokumenti prej shtatë faqesh përcakton hapa të prekshëm, me afate të qarta dhe të pakthyeshme drejt një zgjidhjeje me dy shtete, duke dënuar Hamasin, duke kërkuar dorëzimin dhe çarmatimin e tij, lirimin e pengjeve, një armëpushim të menjëhershëm dhe hyrjen pa pengesa të ndihmës humanitare në Gaza.
Presidenti francez Emmanuel Macron do të jetë një nga figurat kryesore në samit, ndërsa princi i kurorës i Arabisë Saudite, Mohammed bin Salman, pritet të marrë pjesë përmes videolidhjes.
Si përgjigje ndaj këtij konsensusi në rritje, Izraeli po avancon plane për të aneksuar pjesë të Bregut Perëndimor, me synimin e hapur për të mbyllur çdo perspektivë të një shteti palestinez. Diplomacia izraelite ka paralajmëruar masa hakmarrëse ndaj Francës, si mbyllja e konsullatës franceze në Jerusalem, dëbimi i diplomatëve apo kufizimi i bashkëpunimit të inteligjencës. Netanyahu ka akuzuar Macronin se po ushqen zjarrin antisemit në Francë.
Nga ana e tij, Katari, ndërmjetësues mes Izraelit dhe Hamasit, përshëndeti njohjet e fundit nga Britania, Kanadaja, Australia dhe Portugalia.
Ndërkohë, ushtria izraelite ka intensifikuar sulmet në Gaza, duke rritur ofensivën tokësore në qytetin e Gazës dhe duke goditur me sulme ajrore e detare të gjithë enklavën e rrethuar. Të dielën, të paktën 25 anëtarë të një familjeje palestineze u vranë në lagjen Sabra të qytetit të Gazës, në një seri bombardimesh ndaj banesave, të cilat Izraeli i quajti objektiva terroristë.
About the Author
